Շենգավիթ վարչական շրջանի առաջին ատյանի ընդհանուր իրավասության դատարանում, դատավոր Նելլի Բաղդասարյանի նախագահությամբ, շարունակվում է Վեներա Թորոսյանի գործի քննությունը:
Հիշեցնենք, որ դատարանը արգելել էր նիստի լուսաբանումը, չնայած այն հանգամանքին, որ նիստը դռնբաց էր:
Դատական նիստի ընթացքում փաստաբան Արմինե Ֆանյանը միջնորդեց, որպեսզի կիրառվի դատական քննության արագացված կարգ: Դատավորը միջնորդության քննարկումը հետաձգեց, որպեսզի մեղադրողը հրապարակի մեղադրական եզրակացությունը:
Ըստ մեղադրական եզրակացության, Վեներա Թորոսյանը մեղադրվում է սահմանադրական փոփոխությունների հանրաքվեի օրը այլ անձանց փոխարեն քվեարկելու մեջ: Նրան մեղադրանք է առաջադրվել, որ նա Սահմանադրության փոփոխությունների հանրաքվեի ժամանակ Երեւան քաղաքի Շեւչենկո փողոցի թիվ 34/1 հասցեում գտնվող թիվ 8/31 ընտրական տեղամասում, լինելով հանձնաժողովի նախագահ, այլ անձանց` Նարեկ Ալեքսանյանի եւ Վալենտինա Ալեքսանյանի փոխարեն քվեարկելու դիտավորությամբ` նշված ընտրատեղամասի ընտրողների ցուցակում վերջիններիս անվան դիմաց լրացրել է պատահական` համապատասխանաբար անձնագրային տվյալները եւ ստորագրել վերջիններիս փոխարեն, կնքել է ընտրողների ցուցակում, որից հետո հանձնաժողովի մյուս անդամներից աննկատ կատարել է քվեարկություն:
Կարդացեք նաև
Ամբաստանյալը ընդունեց մեղքը եւ պնդեց, որպեսզի դատական քննության արագացված կարգ կիրառվի: Դատարանը բավարարեց միջնորդությունը: Դատաքննությունը ավարտվեց, մեղադրական ճառին նախապատրաստվելու համար մեղադրող Խաչատրյանը խնդրեց հետաձգել դատական նիստը: Հաջորդ դատական նիստը տեղի կունենա ապրիլի 14-ին:
Ամի ՉԻՉԱԿՅԱՆ
