Հատված ԼՂՀ նախագահի մամուլի խոսնակ Դավիթ Բաբայանի հարցազրույցից:
– Պարոն Բաբայան, ԼՂՀ ՊԲ-ն երեկ հաղորդագրություն տարածեց, որ զորքերի տեղաշարժ է նկատվում ադրբեջանական կողմից, սա ի՞նչ է նշանակում, արդյոք այս զինադադարից հետո իրենք հավաքում են իրենց ու կարող է նոր հարձակո՞ւմ լինի։
– Կտեսնենք՝ այդ տեղաշարժը ագրեսի՞վ տեղաշարժ է, ինչ-որ նպատակներ ունի՞, ժամանակը ցույց կտա։ Մենք՝ բանակը, հայությունը, պատրաստ ենք ցանկացած պահի, եթե այդպիսի եւս մեկ փորձ կատարվի, կասեցնել։ Բայց
եթե այս անգամ որեւէ փորձ կատարվի, սա պարզապես կնշանակի միջազգային հանրության կարծիքի հանդեպ խորը անտարբերություն, դա ցույց կտա, որ Ադրբեջանը իր պահվածքով չի հարգում միջազգային հանրությանը եւ ԵԱՀԿ Մինսկի խմբի համանախագահներին, ավելին, նաեւ հարված է հասցնում նրանց միջնորդական ջանքերին։
Կարդացեք նաև
– Այս ընթացքում մեղադրանքներ են հնչել, որ հայկական կողմի հետախուզությունը լավ չի աշխատել, հակառակ պարագայում հնարավոր կլիներ խուսափել այսքան զոհերից, համաձա՞յն չեք։
– Իհարկե, համաձայն չեմ։ Այդ գնահատականները տալիս են մարդիկ, ովքեր ընդհանրապես զինված ուժերի հետ որեւէ առնչություն չունեն։ Այս պահին պետք է շատ զգույշ լինել նման հայտարարություններ անելիս, եւ եթե հայտարարություն արվում է, դա լինի պրոֆեսիոնալ։ Եվ միշտ պետք է մտապահել, որ հակառակորդը այդ ամենին է առաջինը ուշադրություն դարձնում։
Ինչքան մենք պառակտված լինենք, այնքան ավելի լավ իրենց համար։ Իհարկե, ամեն ինչ իդեալական եւ փայլուն չի եղել, պետք է լուրջ հետեւություններ արվեն եւ դա արվում է, բայց դա չի նշանակում, որ ոմանք պետք է «հանճարեղ» հայտարարություններով հանդես գան։
Լուսինե ԲԱՐՍԵՂՅԱՆ
Հոդվածն ամբողջությամբ կարող եք կարդալ «Հայկական ժամանակ» թերթի այսօրվա համարում
