Հարցազրույց ՀՀԿ խորհրդարանական խմբակցության անդամ ՍԱՄՎԵԼ ՆԻԿՈՅԱՆԻ հետ
-Խնդիրը դիտարկենք նաեւ մեկ այլ կողմից. մենք ճի՞շտ ենք աշխատում Ռուսաստանի հետ. տեսեք, հիմնականում շեշտում ենք, թե որքան կարեւոր է ՌԴ-ն Հայաստանի համար, իսկ ռուսական քաղաքական վերնախավում կա՞ այն ընկալումը, որ այս տարածաշրջանում Հայաստանն ունի մեծ դերակատարում իր հյուսիսային գործընկերոջ համար:
-Կարծում եմ, որ դա բավարար չափով չենք անում: Ասեմ ավելին. ցավոք, այդ խնդիրները առավելապես թողնում ենք նախագահի ուսերին: Հիշենք, Սերժ Սարգսյանն էր, որ առաջին անգամ շատ կոշտ արտահայտվեց ՌԴ-ի կողմից Ադրբեջանին զենքի վաճառքի մասին: Մինչդեռ մեր ընդդիմադիրներից շատերը շարունակում էին լռել՝ երբեմն հայ-ռուսական հարաբերություններում դրսեւորելով անհարկի ջերմեռանդություն:
Տեւական ժամանակ մենք ռուսներին փորձում էինք բացատրել, թե ովքեր են թուրքերը, մինչդեռ, ի պատասխան մեզ, նրանք ժպտում էին ու հակադարձում` դուք պետք է մեզ սովորեցնե՞ք, թե ո՞րն է մեր ազգային շահը: Եվ շարունակում էին Թուրքիան համարել իրենց ռազմավարական գործընկերը:
Կարդացեք նաև
Եվ երբ ռուսական ինքնաթիռը խոցեցին թուրքերը, միայն այդ ժամանակ Ռուսաստանը սթափվեց ու հայտարարեց` Թուրքիան թշնամի երկիր է, այսօր իրենք նաեւ կրկնում են հայերիս՝ ժամանակին հայտնած մտահոգությունները պանթյուրքիզմի վտանգների մասին:
Նույնը կրկնվում է հիմա` Ադրբեջանի պարագայում. մենք ի՜նչ էլ ուզում ենք ասել, մինչեւ Ռուսաստանը չկանգնի խնդրի առաջ ու իր մաշկի վրա, անմիջականորեն չզգա Ադրբեջանի վտանգը` շարունակելու է հայտարարել, թե Հայաստանն ու Ադրբեջանը իր ռազմավարական գործընկերներն են:
Եվ դա այն դեպքում, երբ Հայաստանը տարբեր հարցերում՝ թե՛ ուկրաինական, թե՛ ռուս-թուրքական հարաբերությունների սրման ժամանակ, եղել է Ռուսաստանի կողքին ու համամիտ եղել նրա դիրքորոշումներին: Մինչդեռ Ադրբեջանը բացահայտորեն հակադրվել է Ռուսաստանի շահերին` մի դեպքում պաշտպանելով Ուկրաինային, մյուս դեպքում` Թուրքիային, բայց ոչ երբեք Ռուսաստանին:
Արմինե ՍԻՄՈՆՅԱՆ
Հարցազրույցն ամբողջությամբ՝ «Հայոց աշխարհ» թերթի այսօրվա համարում
