«Լույսի կտոր էր, լույսի պես տղա՝ կիրթ, դաստիարակված, զուսպ». Կոնդի սուրբ Հովհաննես եկեղեցում ղարաբաղա-ադրբեջանական շփման գծում զոհված 20-ամյա սերժանտ Ադամ Սահակյանի հոգեհանգիստն էր ու ով դուրս էր գալիս եկեղեցուց, արցունքն աչքերին խոսում էր այդ «լույսի շողի» մասին:
Սոցցանցերում այս օրերին պտտվում էր անհետ կորածների ցուցակում գտնվող Ադամի՝ ժպիտը դեմքին լուսանկարը ու բոլորն աղոթում էին, հավատում էին, որ Ադամը գալու է:
Ծանոթ-անծանոթ, կին-տղամարդ հոգեհանգստի ժամանակ հեկեկալով լաց էին լինում: ԱԺ պատգամավորներ Նաիրա Զոհրաբյանը, Հերմինե Նաղդալյանը, արդարադատության նախարար Արփինե Հովհաննիսյանը արցունքներն էին սրբում՝ չկարողանալով բառեր գտնել՝ հարազատներին սփոփելու համար: Ցավակցելու էր եկել նաեւ Երեւանի քաղաքապետ Տարոն Մարգարյանը, փոխքաղաքապետ Կամո Արեյանը:
Ադամի ընկերները գրկել էին նրա դագաղն ու բաց չէին թողնում: Նրա հորեղբայրը՝ Ժորան, մեզ հետ զրույցում հոնգուր-հոնգուր լաց էր լինում. «Ի՞նչ ասեմ, բալա ջան: Ասելու բան չի, չեմ կարում ասեմ: Վերջին անգամ հետը խոսացել եմ 1- 1.5 ամիս առաջ, դեռ կռիվը չէր սկսել: Ասում էր՝ լավ եմ, ամեն ինչ լավ ա: Շատ սիրով էր ծառայում: Եթե սիրով չգնար բանակ՝ էդ քայլին չէր դիմի»:
Կարդացեք նաև
Թե ինչ հանգամանքներում է զոհվել Ադամը մեզ պատմեցին. «Սերժանտ Ադամ Սահակյանը եղել է Ջեբրայիլի առաջնագծի 112 դիրքի ավագը, կռիվը սկսելուն պես, տղեքին ասելով՝ փախեք, մինչև վերջ մարտնչել է և հետ քայլ չի արել, զոհվել է հերոսի մահով՝ դեմքին ստացած հրազենային կրակոցներից: Ասել էր՝ արխային փախեք, ես կպահեմ ու…չի հասցրել: Հետո իմացանք, որ անհետ կորածների մեջ է, 3-4 օր չէին գտնում, հետո գտան…Մենք գիտեինք՝ նա սաղ է, բայց բանից դուրս է գալիս, որ էլ չկա ինքը: Պաշտպանության նախարարություն էինք անընդհատ կապվում, ասում էին՝ չենք գտել, բան չգիտենք: Մենք էլ որեւէ կապ չունեինք, որ հեռախոսով զանգեինք: Լարված օրերին մեկը զանգել էր ընկերներից, ասել էր՝ ստեղ ա, Ջաբրայիլում ա, ես հեռվից տեսել եմ»:
Ադամ Սահակյանի հուղարկավորությունը տեղի է ունենալու վաղը, ժամը 13.00-ին:
Հռիփսիմե ՋԵԲԵՋՅԱՆ
