«Շատ հստակ երեւաց, թե որտեղ են տեղակայված տեղեկատվական կրակակետերը Ադրբեջանից դուրս»,- ապրիլի 12-ին «Անդրադարձ» մամուլի ակումբում լրագրողների հետ հանդիպման ընթացքում, անդրադառնալով տեղեկատվական պատերազմին, ասաց ԳԱԱ Հայոց ցեղասպանության թանգարան-ինստիտուտի տնօրեն, պատմական գիտությունների դոկտոր Հայկ Դեմոյանը:
Ըստ նրա, ամենալուրջ եւ հուժկու հարվածը ադրբեջանական կողմը ստացել է այն ժամանակ, երբ Ադրբեջանի արտաքին գործերի նախարար Էլմար Մամեդյարովը հրավիրվեց CNN. «Ավելի շուտ դա ծուղակ էր: Իհարկե՛, CNN հրավիրվելը մեծ պատիվ է նույնիսկ արտգործնախարարների եւ նախագահների համար, Մամեդյարովը ուղղակի երկրորդ հարցից հետո հասկացավ, երբ պանամյան թղթերին անդրադարձան, որ դա բավականին լավ պատրաստված ծուղակ է: Սա նաեւ ինչ-որ կերպ ազդանշան հանդիսացավ ադրբեջանական իշխանությունների համար, որ արտաքին ճակատում տեղեկատվական բլոկը ուղղակի շռնդալից կերպով տապալվել է»:
Հայկ Դեմոյանը համարում է, որ Ադրբեջանի իշխանություններին մնում էր չկայացած եւ ծիծաղ հարուցող չակերտավոր հաղթանակը իր ժողովրդին ծախելը. «Բայց ինչքան էլ թերագնահատենք Ադրբեջանի հասարակությանը, զոհերի քանակը եւ տեղեկատվական այլանդակ կեղծարարությունները արդեն իսկ վկայում են, որ այս առումով ինչ-որ տեղ արդեն հասունացել է Ադրբեջանի հասարակությունը, որ հալած յուղի տեղ չի ընդունում իշխանությունների կողմից շինծու այդ տեղեկատվական հոսքերը եւ կեղծարարությունները: Իսկ սա, հավատացնում եմ ձեզ, բավական լուրջ լիցք է, որ կուտակվում է արդեն իսկ կուտակված լիցքի վրա: Թե ինչ ձեւով այն կարող է Ադրբեջանի ներսում պայթել, մենք կարող ենք ականատես դառնալ մոտակա տարիների ընթացքում»:
Հայկ Դեմոյանը նկատեց, որ չնայած այն հանգամանքին, որ Ադրբեջանի ապրիլյան արկածախնդրությունը տապալվել է, Ադրբեջանը կարող է գնալ էլ ավելի մեծ արկածախնդրության, որը բացարձակապես մեզ չպետք է վախեցնի:
Կարդացեք նաև
Ամի ՉԻՉԱԿՅԱՆ
