2015 թվականի նոյեմբերին Նորք Մարաշում բացահայտված հանցավոր խմբին մասնակցություն ունենալու մեջ մեղադրվող ու այդ գործով կալանավորված ազատամարտիկ Աղասի Մարտիրոսյանը շարունակում է պնդել՝ անմեղ է:
Աղասի Մարտիրոսյանին մեղադրանք է առաջադրվել Քրեական օրենսգրքի 223 հոդվածի 2-րդ մասով, եւ 235 հոդվածի 3-րդ մասով:
Ազատամարտիկի փաստաբան Լիաննա Բալյանի խոսքով, իր պաշտպանյալն ազատ արձակվեց, որովհետեւ նախաքննական մարմինը կալանքի տակ պահելու հիմքեր չգտավ. «Կալանքի ժամկետը երկու անգամ երկարաձգել էր՝ այն հիմքով, որ իմ պաշտպանյալը կարող է խուսափել նախաքննական մարմնից, խոչընդոտել նախաքննական մարմնի աշխատանքը, բայց փետրվարի հինգին, երբ երկրորդ անգամ երկարաձգվեց կալանքի ժամկետը, բացարձակ քննչական որեւէ գործողություն չկատարվեց»:
Ըստ փաստաբանի, Աղասի Մարտիրոսյանը երբեւէ իրեն մեղավոր չի ճանաչել, իր անմեղությունն ապացուցելու համար նույնիսկ քսանհինգ օր հացադուլ էր հայտարարել. «Պահանջում էր պարզաբանել, թե ինչու են իրեն ձերբակալել, պահում կալանքի տակ եւ ինքն ինչ կապ ունի զինված հանցախմբի հետ: Նա բացարձակ կապ չուներ այդ խմբի հետ ու հիմքեր չկան իրեն մեղադրելու: Նա հանցախմբի անդամներին չի ճանաչում, առերեսում էլ նրանցից որեւէ մեկի հետ չի եղել»:
Արփինե ՍԻՄՈՆՅԱՆ
