«Վիլյամ Սարոյանը մեծ կամուրջ էր երկու ժողովուրդների՝ հայերի ու ամերիկացիների միջև»,- Երևանի Ավետիք Իսահակյանի անվան գրադարանում այսօր լրագրողների հետ ճեպազրույցում ասաց ՀՀ-ում ԱՄՆ դեսպան Ռիչարդ Միլսը:
Դեսպանը նույնպես մասնակցում էր Ամերիկյան ազգային գրադարանային շաբաթվա (ապրիլի 10-16) միջոցառումների շրջանակում գրադարանի Ամերիկյան անկյունի կազմակերպած բարձրաձայն ընթերցանությանը, որի մասնակիցները փոխնիփոխ ընթերցեցին Վիլյամ Սարոյանի «Մարդկային կատակերգություն» վեպն ամբողջությամբ:
«Սարոյանը լավատես էր,- շարունակեց նա.- հավատում էր, որ կյանքը կարող է փոխվել դեպի լավը, հատկապես պարզ, հասարակ մարդկանց համար: Նա հավատում էր մարդուն, համայնքին, հավատում էր բարուն և վստահ էր, որ հնարավորության դեպքում մարդը կկարողանա բարին արարարել: Սրանք, կարծում եմ, լավ սկզբունքներ, հրաշալի արժեքներ են, որոնց մասին մենք բոլորս պետք է հիշենք»:
ՀՀ-ում ԱՄՆ դեսպանության Տեղեկատվական ռեսուրսների կենտրոնի տնօրեն Ներսես Հայրապետյանն Aravot.am-ի հետ զրույցում նշեց, որ գրադարանային շաբաթվա նպատակը գրքի, գրականության, ընթերցանության, գրադարանների կարևորության մասին ևս մեկ անգամ ընդգծելն է:
Կարդացեք նաև
«Վերջին տարիներին ավելի հաճախակի ենք լսում, որ ընթերցանության նկատմամբ հետաքրքրությունը մեզանում նվազել է: Իրականում, գիրքը թղթային տարբերակով ընթերցողների թիվն է պակասել: Հիմա ավելի շատ էլեկտրոնային տարբերակով են կարդում, իսկ դրանից ընթերցանության նկատմամբ հետաքրքրությունը չի նվազում»,- նկատեց մեր զրուցակիցը:
Սիրանուշ ՀԱՅՐԱՊԵՏՅԱՆ
