Այս օրերին Արցախին ուղարկված համազգային օգնությունն, իհարկե, կարեւոր է, բայց լճացում տեղի ունեցավ` այդքան թխվածքաբլիթը եւ գաթան տանելու տեղ չկա: Այս մասին այսօր «Ելակետ» մամուլի ակումբում ասաց կինոռեժիսոր Արշակ Զաքարյանը:
Հիշեցնենք` նա առաջնագծում տեսանյութեր է նկարահանել:
«Ինձ չի հետաքրքրում ոչ մեկի «Ջիփ»-ը… ինձ իմ խիղճն է մտահոգում: Անում եմ` առանց մտածելու` ինչ որ մեկն իր «Ջիփ»-ը կվաճառի՞ բանակին օգնելու համար, թե ոչ: Մենք` Ազգային գվարդիայի անդամներս, երբ գնացինք դիրքեր, ասացինք` եթե պետք է ամանները լվանալ, կլվանանք: Եթե պետք է զինվորների գուլպաները լվանալ, կլվանանք:
Կամավորության հետ նաեւ կարգապահություն պետք է լինի, ոչ թե ամեն մեկը գնա ու բղավի` «թողեք, ես ավտոմատով գնամ կռիվ»… Այդ ժամանակ դու խանգարող ես դառնում, ոչ թե կամավոր: Եթե զինվորականներն ասում են` այստեղ կանգնիր, ուրեմն բարի եղիր նրանց ասածը կատարել:
Կարդացեք նաև
Ականատես եղա, որ որոշ մարդիկ բողոքում էին եւ ասում` «թողեք մենք գնանք այսպես կամ այնպես անենք»: Ախր այդպես չի կարելի: Կամավորը պետք է կարգապահ լինի»,-ասաց Զաքարյանը:
Նա կամավորներին հորդորում է չխոչընդոտել հրամանատարների աշխատանքին եւ անել այն, ինչ պահանջվում է: Օրինակ, Զաքարյանի ավտոմեքենան ծառայել է վիրավորին տեղափոխելու համար. «Մեքենան ավելի շատ օգուտ տվեց, քան ես` ավտոմատը ձեռքիս: Եթե գնում եք օգնելու, պայմաններ մի դրեք: Եթե դու նախորդ կռվի ժամանակ «Ռեմբո» ես եղել, հիմա պարտավոր ես սերժանտին ենթարկվել: Նա է իրավիճակի տերը եւ նա գիտի ամեն քարի ու թփի տեղը»,-նկատեց Զաքարյանը:
Լուիզա ՍՈՒՔԻԱՍՅԱՆ
