Ռուզաննա Եղնուկյանի գործով քրեական գործ է հարուցվել, նախաքննություն է ընթանում: Այս մասին լրագրողներին հայտնեց փաստաբան Տիգրան Հայրապետյանը (լուսանկարում):
Ռուզաննա Եղնուկյանը տուժող է ճանաչվել, գործով մեղադրյալ չկա. «Վնասվածքը գնահատված է: Նա եւս 5 օր գտնվել է հիվանդանոցում: Մինչեւ այս պահը՝ իր առողջությունը չի վերականգնվել: Այդ ֆիզիկական հետքերը միգուցե վերացել են, բայց նրա առողջությունը խաթարված է, եւ երկար ժամանակ՝ դեռ մեկ ամիս, նրան ակտիվ դեղեր են նշանակել, որ պետք է ընդունի: Բացի դրանից էլ՝ նորից պարբերաբար նա այցելում է հիվանդանոց եւ հետազոտվում: Մենք, իհարկե՛, դիմել ենք համապատասխան մարմինների, մեր կարծիքով՝ նա խոշտանգման է ենթարկվել, այնպիսի զրկանքներ է կրել, որ հետեւանքները մենք տեսնում ենք»:
Հիշեցնենք՝ մարտի 24-ին «Հայ կանանց ճակատ» նախաձեռնության անդամները Գեւորգ Սաֆարյանին ազատ արձակելու պահանջով բողոքի ակցիա էին կազմակերպել Մաշտոցի պողոտայում: Բողոքի ընթացքում ակցիայի մասնակիցները շղթայել էին իրենց։ Ոստիկանները, ուժ գործադրելով, ակցիայի մասնակիցներին մայթ են տեղափոխել, բերման են ենթարկել ցուցարարների: Ռուզաննա Եղնուկյանը այդ ցուցարարների շարքում էր, նա արդյունքում ստացել է վնասվածք՝ գլխի շրջանում եւ տեղափոխվել հիվանդանոց:
Ամի ՉԻՉԱԿՅԱՆ
