«Մենք նախկինում էլ ասել ենք, որ որոշակի փուլում Ղարաբաղը պետք է վերադառնա բանակցային սեղանի շուրջ: Ինչպես գիտեք, ԼՂՀ-ն նախկինում մասնակցել է բանակցային գործընթացին»,-«Արմենիա Մարիոթ» հյուրանոցում այսօր կայացած մամուլի ասուլիսի ընթացքում ասաց Մինսկի խմբի ռուսաստանցի համանախագահ Իգոր Պոպովը` պատասխանելով ԼՂՀ-ի` բանակցային սեղանի շուրջ վերադառնալու մասին հարցին:
Մյուս հարցին, թե համանախագահները որքանով են գիտակցում, որ ԼՂՀ-ն չի կարող Ադրբեջանի մաս կազմել, Պոպովը պատասխանեց. «Ներկա պահին այդ թեման բանակցային գործընթացի տարր է»:
Լրագրողները նաեւ հետաքրքրվեցին` արդյոք համանախագահները եկել են եզրահանգման, թե որ երկիրն է նախահարձակ եղել: Մինսկի խմբի համանախագահներից Ֆրանսիայի ներկայացուցիչ Պիեռ Անդրիոն պատասխանեց. «Իհարկե, մեր մանդատի մեջ չի մտնում որոշել, ով է սկսել: Մենք դրանով չենք զբաղվել: Մեզ համար կարեւոր է, որ Մոսկվայում ձեռք բերված հրադադարի մասին պայմանավորվածությունը պահպանվի եւ քաղաքական բանակցություններ ընթանան»:
