Միացյալ ազգային շարժում կուսակցությունը, որը Վրաստանի նախկին նախագահ Միխեիլ Սահակաշվիլիի գաղափարները կիսող կուսակցություն է, անհանգստացած է Լեռնային Ղարաբաղի հակամարտության շուրջ ստեղծված իրավիճակով։ Այս մասին տեղեկացնում է Грузия Online լրատվական կայքը։
Կուսակցության անհանգստությունը արտահայտվել է Վրաստանի խորհրդարանի պատգամավոր, Միացյալ ազգային շարժման անդամ Գեորգի Գաբաշվիլիի տարածած հայտարարության մեջ։ Նրա խոսքերով Վրաստանի համար կենսական նշանակություն ունի, որպեսզի իր անմիջական հարևանությամբ տիրի խաղաղություն և կայունություն։ Գաբաշվիլիի հայտարարության մեջ մասնավորապես ասվում է. «Մենք աջակցում ենք լարվածության թուլացմանն ու հակամարտության վերջնական խաղաղ կարգավորմանը։ Հիմնական հարցը այն է, որ հակամարտության կարգավորումը պետք է հիմնված լինի տարածքային ամբողջականության հիմնարար սկզբունքների (այս դեպքում՝ Ադրբեջանի), իրենց բնակավայրերը ստիպողաբար լքած մարդկանց վերադարձով, և բնակչության հումանիտար կարիքների ապահովմամբ»։
Հետխորհրդային տարածքում առաջացած հակամարտությունների հիմնական մեղավորը, ըստ պատգամավոր Գաբաշվիլիի, Ռուսաստանի Դաշնությունն է. «Այսօր էլ Ռուսաստանը չի կարողանում համակերպվել հարևան պետությունների սուվերենության և անկախության հետ։ Կոնկրետ այս պարագայում (նկատի ունի ԼՂՀ հակամարտությունը,-խմբ.)՝ իրավիճակի հետագա լարումը տեղավորվում է միայն ՌԴ շահերի համատեքստում, որը հանդես է գալիս, որպես բռնությունների նախաձեռնող»։
Կարդացեք նաև
