«Դիալոգ» մամուլի ակումբում ապրիլի 8-ին Aravot.am-ը ԱԺ պատգամավոր Կարեն Բեքարյանին խնդրեց անդրադառնալ ԵԱՏՄ-ի գործողություններին: Մասնավորապես՝ այն հանգամանքին, որ Ղազախստանը առաջարկել էր հետաձգել Երեւանում կայանալիք ԵԱՏՄ վարչապետների գագաթնաժողովը եւ տեղափոխել այն: Առաջարկը բավարարվել էր, եւ որոշվել էր վարչապետների գագաթնաժողովը հետաձգել մինչեւ ապրիլի 12-ը եւ տեղափոխել Մոսկվա:
«Հետաձգումը Երեւանից համարում եմ աննորմալ երեւույթ, եւ համարում եմ, ոչ բարեկամական քայլ իրականացված Ղազախստանի կողմից: Եվ համարում եմ ոչ նորմալ մոտեցում, երբ որ մնացած երկրները դրան համարժեք չարձագանքեցին: Իհարկե՛, այնտեղ տեսնում եմ տարր, որը Ղազախստանին թույլ տվեց դա արդյունավետ իրականացնել այն է, որ նա հիմա ԵԱՏՄ-ում նախագահող երկիր է, եւ հետեւաբար՝ այդ կոորդինացման երեւույթը կա իր վրա: Բայց սա էլ համարում եմ՝ ոչ կատաստրոֆիկ, որովհետեւ դրան արձագանքելուն, դրան պատասխանելու համանման, համարժեք քայլեր կատարելու հնարավորություններ դեռ կունենանք, կիրականացնենք եւ բոլորս կտեսնենք»:
Հարցին՝ վարչապետ Հովիկ Աբրահամյանը կմասնակցի՞ այդ գագաթնաժողովին, Կարեն Բեքարյանը պատասխանեց. «Ես հակված եմ նրան, որ ինչ ինֆորմացիա, որ հիմա տրվում է, շատ անկեղծ է տրվում, որ դեռ չկա որոշում: Ինչի՞ համար, ձեզ պարզ բացատրեմ, որ ինքը կանգնում է մի այսպիսի երկընտրանքի առաջ՝ դեմարշ, այսինքն՝ այն որոշման նկատմամբ իմ դիրքորոշումն արտահայտել չմեկնելով եւ դուռը խփել: Երկրորդ տարբերակն է գնալ եւ այդ իմ ամբողջ դժգոհությունը եւ այն ամենը, որ ինձ համար անընդունելի էր այս գործընթացում նստել, ասել նրանց երեսին այդ ընդհանուր սեղանին:
Հիմա, եթե մենք անդրադառնում ենք քաղաքական գործընթացին, քաղաքական գործընթացը հետաքրքիր բան ունի՝ դուռը խփում ես այն ժամանակ, երբ ուրիշ ոչ մի ելք չկա: Եվ հետեւաբար՝ կարող է շատ ավելի արդյունավետ լինել գնալը, դա բարձրաձայնելը, գործընկերների նկատմամբ հստակ սեփական վերաբերմունքն արտահայտելը, այդ թվում՝ հետագայում նման բաներից զերծ մնալու համար: Վստա՞հ եք, չէ՞, որ այնտեղ քննարկումների ներքո նաեւ այս ղարաբաղյան վերջին սրացումը չի կարող չլինել, վստա՞հ եք, չէ՞, որ այդ քննարկումների ներքո Ղազախստանը իրեն պետք է դնի դերում, որ ադրբեջանական մոտեցումը, տեսակետը փոխանցում է Եվրասիականի գործընկերներին: Չգնալով ո՞վ է դեմ խոսելու»:
Կարդացեք նաև
Ամի ՉԻՉԱԿՅԱՆ
