Սպիտակում ապրիլի 17-ին սպասվող քաղաքապետի ընտրությունների մասին այսօր «Պոստ Սկրիպտում» մամուլի ակումբում խոսեց Սպիտակի քաղաքապետի թեկնածու, նախկին քաղաքապետ Վանիկ Ասատրյանը: Նա հայտնեց, որ իր նախընտրական շտապի քարոզչական աշխատանքն ապրիլի 1-ից դադարեցվել էր` հաշվի առնելով սահմանային իրավիճակը, իսկ ժամանակավոր հրադադարի մասին պայմանավորվածության ձեռքբերումից հետո քարոզարշավը մեկնարկել է Սպիտակի բոլոր թաղամասերում եւ ուսումնական հաստատություններում:
«2002-08թթ. ես եղել եմ քաղաքապետ եւ իմ կատարած աշխատանքը ժողովրդի աչքի առաջ է: Շնորհակալություն եմ հայտնում մարզպետ Արթուր Նալբանդյանին` ազատ մրցակցային դաշտ ձեւավորելու համար: Իմ հույսը ժողովրդի վրա է: Ես ընտրվել եմ նույն ազատ դաշտում եւ ստացել ժողովրդի քվեն: Հույս ունեմ, որ հիմա էլ կստանամ:
Միայն թույլ մարդը կարող է հայտարարել, որ այս կամ այն մարդն իր կողքին է: Ի՞նչ կապ ունի` ով է թեկնածուի կողքին կանգնած. Սպիտակցին ինքն է ընտրում:Գնահատողը ժողովուրդն է: Ես ոչ մեկի վրա ցեխ չեմ շպրտել»,-ասաց Վանիկ Ասատրյանը:
Ընտրվելու դեպքում նա պատրաստվում է կյանքի կոչել երկրաշարժից փլված սեփական բնակարանների փոխհատուցման ծրագիրը, որը ժամանակին հաստատվել է Կառավարության կողմից: 2008.թ-ին Ասատրյանը չվերընտրվեց քաղաքապետի պաշտոնում, եւ, իր խոսքով, ծրագիրը մնաց փակուղում:
Կարդացեք նաև
«Հերթացուցակը կա, բայց վերանայվելու կարիք ունի: Չեմ կարող ասել, թե ինչու ոչ մեկը ութ տարի չհետաքրքրվեց այս հարցով: Իմ առաջնահերթ ծրագիրը սա է լինելու: 564 ընտանիքի սեփական բնակարանի փոխհատուցման մասին է խոսքը»,-տեղեկացրեց Վանիկ Ասատրյանը:
Լուիզա ՍՈՒՔԻԱՍՅԱՆ
