Ծանրամարտի Հայաստանի տղամարդկանց եւ կանանց ազգային հավաքականներն ավարտեցին ուսումնամարզական վերջին հավաքը եւ այսօր մեկնում են Նորվեգիա՝ մասնակցելու Ֆորդե քաղաքում կայանալիք Եվրոպայի առաջնությանը:
Aravot.am-ը զրուցեց տղամարդկանց հավաքականի առաջատարներից, 77 կգ քաշային Անդրանիկ Կարապետյանի հետ: Նա ասաց, որ երկու հավաքականներն էլ խիստ մտահոգված են Արցախի սահմաններում Ադրբեջանի սադրանքների հետեւանքով ստեղծված իրավիճակով:
«Սահմանին կանգնած հայ հերոս զինվորներին միշտ էլ ասելու բան կա: Նրանք իսկապես մեր հերոսներն են: Ցանկանում եմ, որ խաղաղություն լինի եւ ամեն մի հայ զինվոր առողջ վերադառնա տուն: Մենք հիմա մեկնում ենք Եվրոպայի առաջնություն՝ մեր ճակատամարտը մրցահարթակում տալու:
Հայ դիրքապահների մարտական ոգին ոգեւորում է մեզ: Վստահ եմ, որ մեր հաղթանակներն էլ կոգեւորեն նրանց: Բայց մենք նաեւ միշտ պատրաստ ենք կանգնել մեր հերոս զինվորների կողքին, եթե իրենք դրա անհրաժեշտությունը զգան:
Կարդացեք նաև
Մենք Նորվեգիա մեկնում ենք հաղթանակներ տանելու վճռականությամբ ու բոլորս էլ մեր հաղթանակները նվիրելու ենք Արցախի սահմանին հաղթանակած կանգնած մեր հասակակից հերոս զինվորներին», – ասաց բազմաթիվ անգամ Հայոց Եռագույնը բարձրացրած մարզիկը:
Աշոտ ՀԱԿՈԲՅԱՆ
