«Այսօրվա իրավիճակով ուղղակի անհնար է, որ Ռուսաստանը կարողանա նման քայլի դիմել, քանի որ ԵԱՀԿ ՄԽ ձևաչափը նախատեսում է բացառապես բազմազգ խաղաղապահ զորքերի տեղակայման հնարավորություն»,- այսօր «Հայելի» ակումբում մեկնաբանելով Սերժ Սարգսյանի հայտարարությունը, թե դեմ չենք խաղաղապահ ուժերի տեղակայմանը, ասաց «Նոր ժամանակներ» կուսակցության ղեկավար Արամ Կարապետյանը:
Ինչու այս խառը իրավիճակում Սերժ Սարգսյանը մեկնեց Գերմանիա, դա էլ, ըստ պարոն Կարապետյանի, պատահական չէր. «Ինչպես հայտնի է, ԵԱՀԿ Մինսկի խմբի համանախագահող երկրները կարող են ռոտացիոն կարգով փոփոխվել, իսկ Գերմանիան երբևէ կարող է հավանական թեկնածուներից մեկը դառնալ: Հատկանշական է, որ Սերժ Սարգսյանի այցից հետո Ռուսաստանը, վտանգից զգուշանալով, մի շատ հետաքրքրիր հայտարարություն արեց՝ ՌԴ-ն դեմ է Մինսկի խմբի համանախագահ երկրների կազմի փոփոխությանը»:
Նրա խոսքով, այս փուլում, երբ հրապարակվեցին Ալիեւի ընտանիքի մասին կոռուպցիոն տվյալներ, Ալիևն, իր բոլոր հնարավոր զինատեսակները գործի դնելով, փորձեց ապացուցել՝ թեկուզ նույն այդ ժողովրդից գողացել է, բայց նաև գողացածով թանկ զինատեսակներ էլ է գնել»:
Պարոն Կարապետյանը նաեւ հավելեց, որ Երեւանի տեսախցիկները տանեն Արցախի սահման, հաստատ հակառակորդի հարձակում տեղի չէր ունենա:
Կարդացեք նաև
Պարոն Կարապետյանի խոսքով, Ադրբեջանի կողքին ոչ միայն Թուրքիան է, այլեւ Վրաստանը. «Բաթումի նավահանգստում առաջնահերթ սպասարկվում են Թուրքիայից Ադրբեջան եկող բեռները»:
Մեր հարցին, ինչ հանգուցալուծում եք տեսնում ստեղծված իրավիճակին, ասաց. «Եթե ուզում ես խաղաղություն, պատրաստվիր պատերազմի»:
Արփինե ՍԻՄՈՆՅԱՆ
