Թուրքիայի վարչապետ Ահմեդ Դավութօղլուն կրկին անդրադարձել է Լեռնային Ղարաբաղի հակամարտությանը և դժգոհել ԵԱՀԿ Մինսկի խմբի գործողություններից։ Այս մասին տեղեկացնում է թուրքական «Հաբերլեր» լրատվական գործակալությունը։
Անդրադառնալով ԼՂՀ հակամարտությանը՝ Դավութօղլուն ասել է. «Գիտեք՝ մենք ԵԱՀԿ Մինսկի խմբի անդամ ենք, բայց քանի որ բանակցությունները ստանձնել են 3 համանախագահները, խմբի մյուս անդամները դուրս են մնացել գործընթացից։ Երբ դուք նայում եք այդ երեք երկրներին (նկատի ունի համանախագահող երկրներին՝ ԱՄՆ, Ռուսաստան, Ֆրանսիա,- խմբ.) տեսնում եք, որ այդ երեք երկրներում էլ շատ ուժեղ հայկական լոբբի կա։ Այս է պատճառը, որ այդտեղ չի կարող խոսք անգամ լինել հավասարությունից։ Իհարկե, Ռուսաստանն ու Հայաստանը չեն ցանկանում, որպեսզի Թուրքիան, կամ այլ երկրներ, ներգրավվեն աշխատանքներին, հետևաբար մեր դիրքորոշումը հստակ է՝ ԵԱՀԿ Մինսկի խումբը պետք է փոխվի։ Այսինքն, Մինսկի խմբի անդամ բոլոր պետությունները պետք է իրավունք ունենան ներգրավվել աշխատանքներին»։
Իր խոսքի վերջում Թուրքիայի վարչապետը հերթական անգամ իր աջակցությունն ու զորակցությունն է հայտնել Ադրբեջանի Հանրապետությանը։
