Ինչ մարդիկ իմացել են, որ ԵՏՄ-ից մեքենա ներկրելու հարկը՝ ԱԱՀ-ն հանել են, միտումնավոր չեն գնում մաքսային եւ չեն կատարում վճարումները, մինչեւ օրենքը կմտնի ուժի մեջ: Պետեկամուտների կոմիտեի փոխնախագահը բացատրեց, թե որ դեպքում պետք է վճարեն, որ դեպքում՝ ոչ:
Այսօր ԱԺ-ում քննարկվեց կառավարության կողմից ներկայացված «Բնապահպանական եւ բնօգտագործման վճարների մասին» եւ «Բնապահպանական դրույքաչափերի մասին» օրենքներում փոփոխություններ կատարելու մասին նախագծերի փաթեթը:
Պետեկամուտների կոմիտեի նախագահի տեղակալ Վախթանգ Միրումյանն ասաց, որ առ այսօր բնապահպանական վճարները կատարվում են մաքսային մարմիններին՝ 10-օրյա ժամկետում: Բայց ԵՏՄ անդամակցության շրջանակներում ԵՏՄ-ից ապրանքներ ներմուծելիս մաքսային հայտարարագրում չի կարող կատարվել: Դրա համար նախագծով առաջարկվում է, որ բնապահպանական վճարները վճարվեն հարկային մարմիններին ու ոչ թե 10-օրյա ժամկետում, այլ ներմուծմանը հաջորդող ամսվա մինչեւ 20-ը. «Այսինքն, բիզնեսը 50 օր ժամանակ է ունենում ավելի ուշ կատարելու վճարումը»:
Ըստ Միրումյանի, սա հեշտացնելու է ներմուծողի գործը, ավելորդ քաշքշուկից ազատելու, քանի որ ներմուծման հարկային հայտարարագիր այսպես թե այնպես պետք է ներկայացներ, միանգամից նաեւ բնապահպանական վճարն էլ կանի: Եթե ներմուծված ապրանքով պատրաստվում է մեկ այլ ապրանք, որի համար գործարարը եւս վճարում է բնապահպանական վճար, արդեն պետք է վճարի 1 անգամ՝ կրկնակի հարկումից ազատվում է:
Կարդացեք նաև
ՕԵԿ խմբակցության ղեկավար Հեղինե Բիշարյանը հարցրեց. «Նախագծում խոսք կա մեքենաների ներմուծման մասին՝ 5 տարուց ավելի, մինչեւ 10 տարի առաջ թողարկված եւ այլն: Անցած անգամ մենք ԵՏՄ-ից մեքենաների ներմուծման դեպքում ԱԱՀ-ից ազատեցինք ֆիզիկական անձանց: Հիմա երկակի ստանդարտներ չե՞ն կիրառվում»:
Վախթանգ Միրումյանը պատասխանեց, որ ի տարբերություն ԱԱՀ-ի, ներմուծվող ավտոմեքենաները բնապահպանական վճարի օբյեկտ են. «ԵՏՄ անդամ բոլոր երկրները ունեն այդ վճարը: Երբ ներմուծված մեքենան հին է, կարող է վնաս պատճառել, նման վճար է նախատեսվում»:
Ի դեպ, ՀՀԿ պատգամավոր Վահրամ Մկրտչյանը հարցրեց՝ ինչ մարդիկ իմացել են, որ ԵՏՄ-ից մեքենա ներկրելու հարկը՝ ԱԱՀ-ն հանել են, միտումնավոր չեն գնացել մաքսային եւ չեն կատարել վճարումները, մինչեւ օրենքը կմտնի ուժի մեջ եւ այդ հարկը չեղյալ կհամարվի: Սպասե՞ն, թե՞ նրանց վրա դա չի տարածվելու: Հիշեցնենք, որ այդ օրենքն ուժի մեջ է մտել ապրիլի 1-ից:
Վախթանգ Միրումյանը պատասխանեց, որ բոլոր այն մարդիկ, որոնք մեքենան ներմուծել են այդ ամսաթվից առաջ, նրանք ստիպված են դեռ վճարել հարկը. «Անկախ ձեւակերպումներ կատարելու հանգամանքից, ԱԱՀ-ն պետք է վճարվի հարկային մարմիններին: Իսկ ապրանքների ներմուծման ամսաթիվ է համարվում տվյալ ապրանքը պետական սահմանը հատելու օրը՝ անկախ մաքսային ձեւակերպման ամսաթվից»:
«Հարգելի՛ ժողովուրդ, լսեցի՞ք, գնացեք վճարեք»,- դիմելով քաղաքացիներին՝ ասաց ՀՀԿ պատգամավորը:
Հռիփսիմե ՋԵԲԵՋՅԱՆ
