Ավան եւ Նոր Նորք վարչական շրջանների Ընդհանուր իրավասության դատանում այսօր դատավոր Սամվել Ուզունյանի նախագահությամբ տեղի ունեցավ Սարգիս Խաչատրյանի գործով դատական նիստը: Նրան մեղադրանք է առաջադրվել այն բանի համար, որ ՀՀ Սահմանադրության փոփոխությունների հանրաքվեի ընթացքում հանդիսանալով թիվ 198 ավագ դպրոցում տեղակայված թիվ 2/36 տեղամասային հանձնաժողովի անդամ, կեղծել է 2015թ. դեկտեմբերի 6-ի Սահմանադրական հանրաքվեի արդյունքները:
Ամբաստանյալի ինքնությունը ճշտելուց հետո դատավոր Ուզունյանը հարցրեց, թե երբ եւ որտեղ է ծառայել Սարգիս Խաչատրյանը: Պատասխանը եղավ` «Թալիշում», ինչին դատավորն այսպես արձագանքեց. «Երկրի համար օրհասական պահին ձեր տեղը Թալիշն է, որովհետեւ ծանոթ եք ամեն քարին եւ ծառին…»:
Դատախազ Ա. Շահբազյանի կողմից հրապարակվեց մեղադրական եզրակացությունը, համաձայն որի. «Իր տեղամասում «Այո»-ի բացարձակ հաղթանակն ապահովելու եւ հանրաքվեի արդյունքները կեղծելու դիտավորությամբ, Սարգիս Խաչատրյանը կեղծ տեղեկություններ է մտցրել ընտրացուցակներում` 81 անձանց կողմից քվեարկությանը մասնակցելու վերաբերյալ»:
Մասնավորապես, ըստ մեղադրական եզրակացության, ամբաստանյալը քվեաթերթիկները եւ ծրարները թաքցրել է ծոցագրպանում, սեղանի վրայից գաղտնի վերցրել անհատական կնիքներ, քվեարկությանը չմասնակցած անձանց փոխարեն լրացրել է անձնագրի մտացածին սերիաներ եւ համարներ, իր հանգստի ժամին դուրս գալով տեղամասից` ծոցագրպանում պահված քվեաթերթիկներում «Այո» նշել, ապա կրկին թաքցրել ծոցագրպանում` հետագայում քվեատուփերի մեջ լցնելու նպատակով. «Բնական կարիքները հոգալու պատրվակով դուրս է եկել քվեարկության սենյակից, գնացել զուգարան, որտեղ էլ թվով 20 քվեարկած քվեաթերթիկների «Այո»-ի վանդակում կատարել է համապատասխան նշում, տեղադրել քվեաթերթիկները ծրարների մեջ, ապա կրկին թաքցրել ծոցագրպանում, վերադարձել քվեարկության սենյակ: Մինչ նա փոխարինել է զուգարան գնացած հանձնաժողովի մեկ այլ անդամին, այդ ընթացքում ծոցագրպանում թաքցրած քվեաթերթիկները լցրել է քվեատուփի մեջ»:
Կարդացեք նաև
Խաչատրյանի փաստաբանը` Էդիկ Մայսուրյանը հայտնեց, որ իր պաշտպանյալն ընդունում է մեղքը: «Պաշտպանյալս նախկինում արատավորված չի եղել, կինը սպասում է երրորդ երեխային, եւս երկու անչափահաս երեխա ունեն: Դպրոցի կոլեկտիվն էլ նրան հարգում է: Նա ընդունել է հանցանքը, այս հիմքով խնդրում եմ հնարավորինս մեղմ պատիժ սահմանել»,-պաշտպանական ճառի ընթացքում ասաց փաստաբանը եւ խնդրեց քննությունն անցկացնել արագացված կարգով: Դատարանը բավարարեց այդ միջնորդությունը:
Ներս հրավիրված վկաներին դատավորը տեղեկացրեց, որ, ըստ այդմ, նրանք ազատված են ցուցմունք տալու պարտականությունից: Դատախազն էլ ներկայացրեց ամբաստանյալի պատիժը մեղմացնելու հանգամանքները. «Նա ունի երկու անչափահաս երեխա, որոնք գտնվում են իր խնամքին, բացի այդ, աջակցել է հանցանքի բացահայտմանը եւ զղջացել արարքի համար: Միջնորդում եմ մեղավոր ճանաչել եւ դատապարտել ազատազրկման` 3 տարի ժամկետով»:
Վաղը կհրապարակվի դատական ակտը:
Լուիզա ՍՈՒՔԻԱՍՅԱՆ
