«Ադրբեջանը միջազգային իրավունքի քրեական կոպիտ խախտում կատարեց: Մենք պատրա՞ստ ենք այս հարցը բարձրացնել միջազգային կառույցներում: Ադրբեջանը չի թաքցնում, որ զենքի ուժով պետք է հետ բերի այն հողերը, որտեղ ապրում է մի ժողովուրդ, որը չի հանդուրժի Ադրբեջանի կրնկի տակ գտնվելը»,-այսօր «Անալիտիկ» մամուլի ակումբում այսպիսի հարցադրում արեց Արտակարգ եւ լիազոր դեսպան Արման Նավասարդյանը:
Նրա խոսքով` Եվրոպային պետք է բացատրել Ադրբեջանի գործելաոճի վտանգները. «Ռուսաստանում Ադրբեջանի դեսպանն էլ գետինը չի մտնում, ասում է` զենքի ուժով պետք է լուծենք… Այստեղ խախտվեցին դիվանագիտական բոլոր կանոնները: Ադրբեջանն այն հակառակորդն է, որը չի հասկանում եւ չի ուզում հասկանալ դիվանագիտական լեզուն: Ալիեւը հիմար չէ, հենց այնպես չէր վերցնի եւ այդ քայլին գնա»:
Դեսպանի կանխատեսմամբ. «Հարցերն այնպես չեն լուծվելու, ինչպես Անկարան կամ Ադրբեջանն են ուզում: Մենք ինչո՞ւ չունենք զանգվածային ոչնչացման զենք: Մենք դրա կարիքն ունենք: Պետք է ունենանք նաեւ արտասահմանյան լեգեոններ, օրինակ` Ֆրանսիայում»:
Լուիզա ՍՈՒՔԻԱՍՅԱՆ
