Սերժ Սարգսյանն առաջարկեց մեկ քայլ առաջ գնալ: Թե ի՞նչ է նշանակում այդ «մեկ քայլ առաջը», արդյոք խոսքը նոր տարածքների՞ մասին է՝ Արմեն Աշոտյանն իր մեկնաբանությունը տվեց:
«Միջոցներ են ձեռնարկվել սահմանամերձ շրջանի բնակչության անվտանգության ապահովման համար: Կարծում եմ՝ այդ միջոցները բավարար են, բայց ես համոզված եմ եւ առաջարկում եմ քննարկենք, որ մենք մեկ քայլ առաջ պետք է գնանք»,- նախագահ Սերժ Սարգսյանն Ազգային անվտանգության խորհրդի նիստում այսպիսի առաջարկ էր արել:
Թե ի՞նչ է նշանակում այդ «մեկ քայլ առաջը», արդյոք խոսքը նոր տարածքների՞, նախահարձակ լինելո՞ւ մասին է՝ ՀՀԿ փոխնախագահ Արմեն Աշոտյանը Aravot.am-ի հետ զրույցում պատասխանեց. «Կարծում եմ, ռազմաքաղաքական տեսակետից պետք է բավարարվել այն հրապարակային ուղերձով, որը եղել է: Դա Անվտանգության խորհրդի նիստ է: Բացել հայկական կողմի բոլոր քարտերը՝ անհեռատես քայլ կլիներ եւ կվնասեր մեր անվտանգությանը»:
Նա հիշեցրեց, որ անցյալ տարի մենք պետության մակարդակով կազմակերպեցինք աննախադեպ զորավարժություններ, որոնց ընթացքում նման արտակարգ իրավիճակներում պետության տարբեր կառույցների պատրաստության աստիճանը ստուգվեց եւ բարձրացվեց. «Կարծում եմ, այդ զորավարժությունների ընթացքում ձեռք բերված հմտությունները պետական կառավարման համակարգի համար անգնահատելի են: Այսօր մենք տեսնում ենք, որ մշակված սխեմաները, կառավարման մեխանիզմները, լրացուցիչ միջոցներ գործադրելու ունակությունը, պետության ողջ կարողությունը մոբիլիզացնելու հնարավորությունը մեր ազգային անվտանգության կարեւոր երաշխիքներից մեկն է»:
Կարդացեք նաև
Հռիփսիմե ՋԵԲԵՋՅԱՆ
