Միացյալ Նահանգները կտրուկ դատապարտել է Լեռնային Ղարաբաղի շփման գծի երկայնքով հրադադարի ռեժիմի խախտումները, ըստ «Ամերիկայի ձայն» ռադիոկայանի՝ հայտարարել է ԱՄՆ-ի պետքարտուղար Ջոն Քերրին.
«Միացյալ Նահանգները ամենախիստ ձեւով դատապարտում է Լեռնային Ղարաբաղի շփման գծի երկայնքով հրադադարի ռեժիմի լայնածավալ խախտումները, որոնք հանգեցրել են զոհերի, այդ թվում` քաղաքացիական անձանց շրջանում: Մենք ցավակցություն ենք հայտնում բոլոր տուժած ընտանիքներին: Մենք կոչ ենք անում կողմերին զսպվածություն ցուցաբերել, խուսափել իրավիճակի սրումից եւ խստորեն պահպանել հրադադարի ռեժիմը:
Անկայուն իրավիճակն ապացույցն է, որ կողմերին անհրաժեշտ է անմիջապես բանակցություններ սկսել ԵԱՀԿ Մինսկի խմբի համանախագահների հովանու ներքո՝ հակամարտության համապարփակ կարգավորման վերաբերյալ»:
Մենք վերահաստատում ենք, որ չկա հակամարտության ռազմական լուծում: Որպես համանախագահող երկիր, Միացյալ Նահանգները պատրաստ է հաստատակամորեն աշխատել կողմերի հետ՝ բանակցությունների միջոցով տեւական խաղաղության հասնելու նպատակով», – ասվում է ԱՄՆ-ի պետքարտուղար Ջոն Քերրիի հայտարարության մեջ:
