«Միջազգային հանրության զգուշացումը երեւի թե գալիս է նրանից, որ նրանք չեն ուզում վիճակը էլ ավելի վատթարացնել»,- ապրիլի 2-ին պատասխանելով լրագրողների հարցերին՝ ասաց ԼՂՀ նախագահի մամուլի խոսնակ Դավիթ Բաբայանը:
«Բայց կարծում եմ՝ հիմա պահը չէ, արդեն ամոթ է: Երբ որ Ալիեւը համարձակվում է ԵԱՀԿ Մինսկի խմբի համանախագահներին անվանել սադրիչներ, սա արդեն ահազանգ է: Այսինքն՝ սադրիչ նա համարում է ոչ միայն համանախագահներին, այլ նաեւ այդ պետություններին, ուրեմն՝ սադրիչ դառնում է ԱՄՆ-ն, Ռուսաստանը, Ֆրանսիան՝ երկրներ, որոնք պայքարում են ահաբեկչության դեմ: Հետեւաբար՝ Ալիեւը փորձ է արել շահարկել ԵԱՀԿ Մինսկի խմբի համանախագահների դիրքորոշումը՝ որպես քրիստոնեական աշխարհի դիրքորոշում մահմեդական երկրի նկատմամբ: Ինչը նույնպես անհեթեթություն է, եւ շատ վտանգավոր հայտարարություն, քանի որ մենք հիմա տեսնում ենք, այդ Իսլամական պետություն կոչված ծայրահեղականները եւ մնացած ծայրահեղ խմբավորումների ներկայացուցիչները ինչպես են փորձում զգացմունքների վրա իրենց ստոր գործունեությունը շարունակել: Հիմա Ադրբեջանը նույն երեւույթը շարունակում է, բնական է, որ սա վտանգավոր է»,- ասաց Դավիթ Բաբայանը:
Նա համարում է, որ միջազգային հանրությունը պետք է ավելի կոշտ դիրքորոշում ցուցաբերի, որովհետեւ արդեն պատվի եւ արժանապատվության խնդիր է:
Ամի ՉԻՉԱԿՅԱՆ
