«Ադրբեջանական զինուժը փորձել է Թալիշի եւ Նոր Սեյսուլանի ուղղությամբ որոշ գրոհներ իրականացնել, բայց ամբողջությամբ տապալվել է նրանց նախաձեռնությունը»,- ապրիլի 2-ին լրագրողների հետ զրույցում ասաց ԼՂՀ նախագահի մամուլի խոսնակ Դավիթ Բաբայանը:
Նա նշեց, որ ադրբեջանական զոհերի թիվն անցնում է մի քանի տասնյակը, սակայն այդ տեղեկատվությունը թաքցնում են. «Ոչնչացվել են մի քանի դիվերսիոն խմբեր, նաեւ այլ ստորաբաժանումներ են տվել կորուստներ: Երբ որ ետ են շպրտվել այդ ստորաբաժանումները, այնքան մեծ էր խուճապը, որ դա նաեւ փոխանցվել է քաղաքացիական բնակչությանը՝ Արցախի Հանրապետության սահմանամերձ ադրբեջանական շրջաններում սկսվել է կանոնավոր խուճապ եւ բնակչության մասսայական արտահոսք»:
Դավիթ Բաբայանը հայտնեց, որ հայկական կողմը եւս կորուստներ ունի, կան զոհեր, վիրավորներ, որոնց թիվը ճշտվում է. «Ադրբեջանական կողմը թիրախավորել է դպրոց, ինչը կոպիտ խախտում է համարվում միջազգային մարդասիրական իրավունքի, Ժնեւյան կոնվենցիաների, որովհետեւ քաղաքացիական նման օբյեկտները՝ դպրոցներ, մանկապարտեզներ, հիվանդանոցներ, չեն կարող լինեն լեգիտիմ թիրախ նույնիսկ պատերազմի ժամանակ: Բայց մենք գործ ունենք ահաբեկչական պետության հետ, իսկ ահաբեկիչների համար ո՛չ օրենք, ո՛չ բարոյական նորմաներ գոյություն չունեն»:
Ամի ՉԻՉԱԿՅԱՆ
Կարդացեք նաև
Ստեփանակերտ
