«Հակառակորդի կողմից իրականացվող գործողություններն աննախադեպ են, թե լկտիությամբ, թե ծավալով, թե օգտագործված սպառազինության առումով: Փաստացի հրետանի, տանկեր, օդուժ են օգտագործել: Ինչքան կտեւեն այս գործողությունները, դժվար է ասել, որովհետեւ հակառակորդն ունի բավականին մեծ կորուստներ ամբողջ ռազմաճակատի երկայնքով: Խուճապային տրամադրություններ են իրենց մոտ»,- Aravot.am-ին ասաց ռազմական փորձագետ Կարեն Վրթանեսյանը:
Նա, վկայակոչելով սոցցանցերի ադրբեջանցի օգտատերերին, ասաց, որ արդեն տարածվում են տեսանյութեր՝ ինչպես է ադրբեջանական կողմը նոր զինտեխնիկա սահման բերում. «Այս պահի դրությամբ իրենք բավականին լուրջ կորուստներ ունեն, իհարկե, հայկական կողմն էլ կորուստներ ունի, բայց իրենցն անհամեմատելի ավելի շատ է»:
Մեր հարցին՝ ինչո՞վ են պայմանավորված ադրբեջանական կողմի գործողությունները, արդյո՞ք Ալիեւի՝ ԱՄՆ տապալված այցի արդյունք է, ինչպես կարծում են որոշ ռուս քաղաքագետներ, փորձագետն ասաց. «Հակադարձելու այդ կարծիքին որեւէ փաստարկ չունեմ: Ադրբեջանի կողմից արդեն ընդունված գործելաոճ է՝ ցանկացած հանդիպում փորձում են ուղեկցել լարվածության աճով: Ամենայն հավանականությամբ Ադրբեջանը խնդիրներ ունեցել է Վաշինգտոնում, ինչը միանգամից վերածվել է այսպիսի գործողությունների, չի բացառվում, որ նախօրոք ծրագրված էր: Այս պահի դրությամբ սպասողական վիճակ է, ենթադրում եմ՝ լուրջ բանակցություններ են վարվում թե ՌԴ-Ադրբեջանի, թե ՌԴ-Հայաստանի միջեւ: Այս հարցով կոնկրետ բան չեմ կարող ասել»:
Արփինե ՍԻՄՈՆՅԱՆ
Կարդացեք նաև
