Մտավորականների խորհուրդն այսօր կազմակերպեց հերթական քննարկումը` «Աշխարհաքաղաքական վերափոխումները Մերձավոր Արևելքում. Հայաստանին ուղղված մարտահրավերները թեմայով»: Մասնակիցները փորձագետների հետ միասին ներկայացրեցին այս համատեքստում ՀՀ-ին սպառնացող վտանգները` դժգոհելով, որ Հայաստանը պետական մակարդակով հետամուտ չէ աշխարհում եւ հատկապես տարածաշրջանում տեղի ունեցող իրադարձություններին:
«Տարածաշրջանում իրավիճակն օր օրի թեժանում է: Զարմանալի է, թե ինչպես ՀՀ-ն չունի հստակ ձեւավորված արտաքին քաղաքականություն: Մինչ օրս Մերձավոր Արեւելքում քրիստոնյաների, այդ թվում` հայերի բնաջնջման հետ կապված հստակ հայտարարություն չի արվել: Ընդ որում, հայերի բնաջնջումը կատարվում է նույն սցենարով, ինչ 1915թ.-ին: Անկախ նրանից, թե ինչ հարաբերությունների մեջ է Հայաստանը Թուրքիայի հետ, մեր դիրքորոշումը ցեղասպանության հետ կապված պետք է լինի հստակ: ՀՀ-ն պետք է պետական մակարդակով ձեռնարկի միջոցներ` Սիրիայի քրիստոնյաներին պաշտպանելու համար»,-նկատեց Երևանի աշխարհաքաղաքական ակումբի ղեկավար Արման Բոշյանը:
Նրա խոսքով. «Հայաստանում կծրագրվեն ռազմական հեղաշրջումներ, սադրանքներ կլինեն, ուստի անհրաժեշտ է վերահսկել ՀՀ-ում գործող իրականում թուրքամետ կազմակերպություններին, որոնք նաեւ ադրբեջանական ուժերին են պաշտպանում: ՀՀ նախագահին նաեւ կոչ եմ անում կազմակերպել հայերի պաշտպանության հարցը Թուրքիայում: Բացի այդ, այսօր գործարարները Հայաստանում աշխատում են գումար եւ արտահանում այն: Եթե բիզնեսը հակապետական է, չի ծառայում մեր ներքին անվտանգությանը»:
Կարդացեք նաև
Խոսելով սիրիական հակամարտության հանգուցալուծման գործում Ռուսաստանի դերակատարումից, արտակարգ եւ լիազոր դեսպան Արման Նավասարդյանը նշեց, որ ահաբեկչությունն, այնուամենայնիվ, իր բնում չոչնչացավ. «Գրոհայինները տարածվում են աշխարհում: Եթե ասում ենք, որ «Ալ Քաիդա»-ն չարորակ ուռուցք է, ապա «Իսլամական պետությունը» սպառնում է ողջ աշխարհին: Այդ խմբավորումն իր սեւ գործն արեց Իրաքում եւ նույնը կարող է անել Մերձավոր Արեւելքի մյուս հայկական համայնքներում: Որոշ մասնագետներ ասում են, թե Հայաստանին այս ամենը չի սպառնում, բայց Ադրբեջանը կարող է վերածվել «Իսլամական պետության», եւ չգիտենք` դրանից հետո ինչ կկատարվի: ԻՊ-ն, եթե պետք եղավ, Թուրքիային էլ կտապալի եւ ահաբեկիչների համար դեպի Հարավային Կովկաս ճանապարհ կբացի: Բացի այդ, Թուրքիան կարող է ահաբեկիչներին ուղղորդել դեպի Կովկաս եւ Հայաստան»:
Պարոն Նավասարդյանը հավելեց, որ Հայաստանի օլիգարխիկ վերնախավի քաղաքականությունը պակաս վտանգավոր չէ Թուրքիայից եւ ԻՊ-ից:
Հայաստանի դեմոկրատական կուսակցության նախագահ Արամ Սարգսյանն էլ անդրադարձավ ԼՂ հակամարտության կարգավորման խնդրին` նկատելով, որ գործընթացի վրա առանձնակի ազդում է թուրք-ադրբեջանական հարաբերությունների ներկայիս մակարդակը. «Եթե մինչեւ վերջերս Ալիեւն ինչ-որ չափով իր սեփական շահերից ելնելով էր իրականացնում իր քաղաքականությունը, ապա այս պահին Էրդողանն է հանձնարարականներ տալիս Ալիեւին: Մի կողմ քաշվել եւ չհասկանալ, թե ինչպես է դա անդրադառնալու մեր բանակցային գործընթացի վրա, սխալ է»:
Հավելենք, որ քննարկումների արդյունքում ձեւավորված առաջարկները Մտավորականների խորհուրդը պատրաստվում է ներկայացնել պետական մարմիններին:
Լուիզա ՍՈՒՔԻԱՍՅԱՆ
