Այսօր ԱԺ պատգամավոր Էդմոն Մարուքյանը պետաիրավական հարցերի հանձնաժողովի քննարկմանը ներկայացրեց մի նախագիծ, որով առաջարկում է Տնտեսական մրցակցության պաշտպանության, Հեռուստատեսության եւ ռադիոյի ազգային, Հանրային ծառայությունները կարգավորող հանձնաժողովների եւ Վերահսկիչ պալատի նախագահները լինեն ապակուսակցական եւ ազատվեն իրենց «զնաչոկներից»՝ կրծքանշաններից:
Կառավարությունը գաղափարին կողմ էր, բայց առաջարկեց, որ Էդմոն Մարւքյանը հետաձգի իր նախագիծը, քանի որ իրենք ավելի մեծ փաթեթ են պատրաստում:
Արդարադատության նախարար Արփինե Հովհաննիսյանն առաջարկեց, որ Էդմոն Մարուքյանն իրենց հետ աշխատի,եթե դժգոհ լինի լուծումներից, նորից իր նախագիծը բերի:
Էդմոն Մարուքյանը դժգոհեց. «Մենք մեր Սահմանադրական գործառույթները չենք իրականացնում, 5 տոկոսն է գրում օրենքների խորհրդարանը: Սպասում ենք, որ կառավարությունը օրենքներ գրի՝ բերի, մենք ընդունենք: Ինչ օրենք բերում ենք՝ կառավարությունն ասում ՝ ես արդեն գրում եմ, ձերը տարեք»:
Կարդացեք նաև
Հանձնաժողովի նախագահ Հովհաննես Սահակյանն էլ ասաց, որ նոր ենք վերադարձել Գերմանիայից, Բունդեսթագում 0 տոկոս են կազմում պատգամավորների նախաձեռնությունները: Այնտեղ որակյալ մեծամասնություն չկա, գրեթե շանս չունի որեւէ նախագիծ առաջ տանելու:
ԲՀԿ խմբակցության պատգամավոր Տիգրան Ուրիխանյանն էլ հարց ուղղեց, որը հարուցեց բոլոր ներկաների զարմանքը. «Դուք տեղյա՞կ եք, որ կառավարությունը նոր նախագիծ է մշակել, որով սահմանվելու է, որ Տնտեսական մրցակցության պաշտպանության նախագահը պիտի պարտադիր լինի ՀՀԿ-ից, բայց մրցակցությունն ապահովելու համար ստեղծվելու է երկրորդ հանձնաժողովը, որը իր կառույցով մրցակցելու է առաջին ՏՄՊՊՀ-ի հետ, որ ազատ մրցակցության պայմաններում մրցակցություն իրականացնեն»:
Ավելի ուշ պարզվեց, որ դա Ուրիխանյանի ապրիլմեկյան կատակն էր. «Շնորհավոր ապրիլի 1-ը՝ որպես կատակի օր»:
Հռիփսիմե ՋԵԲԵՋՅԱՆ
