Ինչպես ավելի վաղ հայտնել էինք, Կառավարությունը երեկ հավանություն տվեց ԱԺ պատգամավոր Էդմոն Մարուքյանի օրենսդրական նախաձեռնությանը, համաձայն որի` ընտրակեղծիք կատարողների պատիժը պետք է քրեականացվի եւ ոչ թե տուգանք սահմանվի, այլ ազատազրկում:
ԱԺ ՀՀԿ խմբակցության պատգամավոր Կարինե Աճեմյանն այս առաջարկը «հետընթաց» է որակում, միաժամանակ նկատում է, թե քանի դեռ Հայաստանում ընտրությունների մշակույթը ձեւավորված չէ, ինչ-որ կերպ պետք է ընտրակեղծարարության դեմն առնել:
«Շատ լավ կլիներ, որ հասարակության եւ կուսակցությունների գիտակցությունն այնքան բարձր լիներ, որ նման առաջարկ չքննարկվեր: Կողմնակից լինել չեմ կարող, բայց ինչ-որ կերպ պետք է հարցը վերջնական լուծվի եւ որքան հնարավոր է` ընտրակեղծարարություններից զերծ մնանք: Հայ իրականության մեջ բացասականի հանդեպ արձագանքն ավելի մեծ է, քան դրականի: Դա է պատճառը, որ նման քայլերի ենք գնում»,-այսօր «Հայացք» մամուլի ակումբում ասաց տիկին Աճեմյանը:
Պատգամավոր Թեւան Պողոսյանն էլ այսպես արձագանքեց. «Երանելի կլիներ, եթե ՀՀ-ում քրեական օրենսգրքի փոխարեն Աստվածաշունչ լիներ: Ցավոք այդպես չէ: Գիտակցենք, որ քվեի գողությունն էլ է գողություն: Ի՞նչ է նշանակում կնոջ կամ ամուսնու տեղն է քվեարկել… Քվեն մարդու սեփականությունն է: Մեկ քվե գողանալն էլ է պատժելի»:
Կարդացեք նաև
Լուիզա ՍՈՒՔԻԱՍՅԱՆ
