Գարնանը շատերի դեմքի մաշկը արեւից, եղանակային պայմաններից գունափոխվում եւ ավելորդ բծեր են հայտնվում, որը շուտ մաքրելու, դեմքը փափկեցնելու եւ սպիտակեցնելու համար առաջարկվում է ժամանակ առ ժամանակ համապատասխան դիմակներ դնել:
Թարմացնող եւ սպիտակեցնող միջոց է ձվի դեղնուցով պատրաստված դիմակը, որը պատրաստելու համար ձվի դեղնուցը պետք է առանձնացնել եւ խառնել 0,5 թեյի գդալ մեղրի հետ: Ավելացնել 3-5 կաթիլ կիտրոնահյութ եւ 1 թեյի գդալ վարսակի ալյուր: Խյուսը քսել դեմքին, պահել 15-20 րոպե: Լվացվել սառը ջրով, ապա դեմքին դնել սառը թրջոց:
Նմանատիպ մեկ այլ դիմակ էլ առաջարկվում է ձվի սպիտակուցով:
Ձվի սպիտակուցը լավ հարել՝ մինչեւ փրփրելը, ավելացնել 1 թեյի գդալ կիտրոնահյութ, կիտրոնի մանր կտրատած կեղեւ, ինչպես նաեւ՝ 1-2 թեյի գդալ նշի քերուկ: Այս դիմակը դեմքին 10 րոպե պահելուց հետո դարձյալ դեմքին դնել սառը թրջոց եւ լվանալ սառը ջրով:
Կարդացեք նաև
Օգտակար են նաեւ վիտամինային դիմակները: 2 թեյի գդալ մեղրին ավելացնել քերիչի մանր հատվածով անցկացրած փոքր խնձոր եւ 1 դեսերտային գդալով ձիթապտղի յուղ: Քսել դեմքին, 10-15 րոպե հետո լվացվել գոլ ջրով:
Պատրաստեց ԱՆՈՒՇ ՄԱԹԵՎՈՍՅԱՆԸ
«Առավոտ» օրաթերթ
31.03.2016
