Եթե 2017 թվականի խորհրդարանական ընտրություններն անցկացվեն մեկ փաստաթղթով`նույնականացման քարտով, ապա դրանք կլինեն ազատ եւ արդար, կեղծիքներ անել հնարավոր չի լինի, իհարկե, բացառությունները մի կողմ թողնելով: Այս համոզմունքին է ՀՀԿ խմբակցության պատգամավոր Մկրտիչ Մինասյանը: Այդ մասին նա այսօր ասաց «Հայելի» մամուլի ակումբում:
«Հայաստանում ի՞նչը չի կեղծվում: Գնալու ենք համակարգչի՞ն դատի տանք»,- իշխանական պատգամավորին հակադարձեց «Ազգային համաձայնություն» կուսակցության նախագահ Արամ Հարությունյանը:
Նա կարծում է, որ նախագծում առկա վիճելի դրույթները միանգամայն հնարավոր են դարձնում իշխանության վերարտադրությունը`կամայականությունների միջոցով, ուստի, կողմ է, որ դրանք շտկվեն:
«Սահմանադրությունը կարված է Սերժ Սարգսյանի վրայով, որոշ տեղեր շուլալված են: Այդ շուլալված մասն ընտրական օրենսգիրքն է, եւ մենք տեսնում ենք, թե ինչպես են իշխանություններն այն կարում: Ուզում եմ, որ իշխանությունները մտածեն, թե այն ժամանակ, երբ իշխանություն չեն լինի այլեւս, այս Ընտրական օրենսգիրքն ինչքան խնդիրներ կառաջացնի նրանց համար»,- իր կարծիքը բարձրաձայնեց Արամ Հարությունյանը:
Կարդացեք նաև
Հակադարձելով Մկրտիչ Մինասյանի պատճառաբանություններին`քվեարկածների ցուցակները չհրապարակելու մասով, Արամ Հարությունյանն ասաց. «Գաղտնիության խնդիր չկա: Հազար մարդ դրսում կանգնած տեսնում է, որ Պողոսը եկավ եւ քվեարկեց: Հասկանալի է, որ եթե ցուցակները հրապարակվեն, հարեւանը կտեսնի, որ բացակայող հարեւանը քվեարկել է, եւ միանգամից պարզ կդառնա, թե ինչ է կատարվել»:
Նելլի ԳՐԻԳՈՐՅԱՆ
