«Կարեւորը արդյունքներն են, որ արդարացված կամ ձախողված լինի այդ ձեւաչափը, դեռեւս վաղ է նման եզրակացություն կայացնել»,- մարտի 31-ին «Մեդիա կենտրոնում» լրագրողների հետ հանդիպման ընթացքում, խոսելով «4+4+4» ձեւաչափի մասին, ասաց ԱԺ ՀԱԿ խմբակցության պատգամավոր Արամ Մանուկյանը:
Նրա խոսքերով՝ կարեւորը սկզբունքային խնդիրն է՝ բանակցությունների արդյունքում հասնել պայմանավորվածությունների, որոնց միջոցով կբարձրանա քաղաքացիական, քաղաքական ուժերի, հասարակության վստահությունը առ այն, որ կեղծիքները հասնելու են նվազագույնի. «Դրա համար շատ ժամանակ տրված չէ: Մենք գիտենք, որ մինչեւ հունիս պետք է վերջնական եզրակացություն արվի, բայց մենք նաեւ չենք գնալու ժամանակ սպանելու տարբերակով, որովհետեւ գիտենք՝ իշխանությունը կարող է ձգել-ձգել-ձգել, հոգնեցնել, մաշեցնել: Առավելագույնը՝ կարծում եմ՝ 3 շաբաթ կմասնակցենք այս գործընթացին, կհասնենք հաջողության, կհասնենք, այդ հաջողությունը կլինի ոչ թե ՀԱԿ-ինը կամ քաղաքացիականինը, այլ Հայաստանինը: Չենք հասնի, կփորձենք ուրիշ մեթոդներ կիրառել, կփորձենք այլ ճնշման մեխանիզմներ բանեցնել, որպեսզի օրենքը բարելավվի»:
Արամ Մանուկյանը ընդգծեց, որ ինքն այս ընթացքում չի մտել օրենքի քննարկման մեջ. «Կա 1 համալիր՝ մեր ներկայացրած այդ 5 կետերից բաղկացած ամփոփ, միասնական առաջարկը ամբողջական է շուրջ 240 Հ/Կ-ների կողմից եւ 12 կուսակցությունների: 12 կուսակցություններից 8-ը խորհրդարանում ունեն պատգամավորներ, սա լայն կոնսոլիդացիա է հասարակական, քաղաքական ուժերի: Եվ եթե հասարակությամբ, քաղաքականությամբ զբաղվող Հ/Կ-ների, քաղաքական ուժերի մի լուրջ ստվար, մեծ զանգված եկել հասել է միասնական կետերի, ապա իշխանությունը պետք է ընդունի սա կամ հիմնավորի՝ ինչու չի ընդունում: Այդ դեպքում լրիվ վերաբերմունքը փոխվում է, եւ լրիվ ուրիշ ածականներ, գնահատականներ կփորձենք կիրառել»:
Ամի ՉԻՉԱԿՅԱՆ
Կարդացեք նաև
Լուսանկարը՝ «Մեդիա կենտրոնի»:
