Թուրքիայի նախագահ Ռեջեփ Թայիփ Էրդողանը հարցազրույց է տվել CNN-ին, որի ժամանակ խոսել է միջազգային ահաբեկչության խնդրի և Թուրքիա-Եվրոպա հարաբերությունների մասին։
ԱՄՆ մայրաքաղաք Վաշինգտոնում անցկացվող Միջուկային անվտանգության գագաթնաժողովին մասնակցելու նպատակով ԱՄՆ մեկնած Թուրքիայի նախագահ Էրդողանը հարցազրույցի ընթացքում ասել է, որ եվրոպական երկրները չեն անում այն, ինչ անհրաժեշտ է միջազգային ահաբեկչության դեմ պայքարելու համար։ Էրդողանը քննադատել է այն երկրներին, որոնք թույլ են տալիս տարածվել «Իսլամական պետություն» ահաբեկչական խմբավորմանը և նշել, որ եվրոպական երկրները չեն կատարում իրենց վրա ընկած պարտականությունները։
Էրդողանը բողոքել է նաև, որ Եվրոպան միայնակ է թողել Թուրքիային ահաբեկչության դեմ պայքարի գործում. «Մենք կոչ ենք արել երկրներին միացյալ ուժերով պայքարել ահաբեկչության դեմ։ Արևմտյան երկրները մեզ միայնակ են թողել։ Երբևէ չիրականցվեց մեր սպասելիքը, երբ կոչ էինք անում երկրներին միմյանց տրամադրել հետախուզության տվյալները»։
Նշելով, որ եվրոպական երկրներն անհաջողակ են ահաբեկչության դեմ պայքարի գործում՝ Էրդողանն ասել է, որ նրանք դեռևս չեն հասկացել, թե ինչ է նշանակում ջիհադը։
Կարդացեք նաև
Հարցազրույցի ընթացքում Էրդողանն ասել է. «Բելգիան և Հոլանդիան առաջին հերթին պետք է հասկանան, թե ինչ է նշանակում ջիհադն ու ջիհադիստը։ Նրանք ռազմիկնե՞ր են, թե՞ ոչ. թե´ Բելգիան, թե´ Հոլանդիան սա պետք է հասկանան։ Երբ մենք կոչ էինք անում համատեղ պայքարել ահաբեկչության դեմ, Եվրոպայի մի շարք երկրներ կարևորություն չէին տալիս այդ կոչին»։
