Եթե ԵՏՄ-ից ներկրվող ավտոմեքենաների ավելացված արժեքի հարկը հանվեց, ապա ինչո՞ւ գազի դեպքում, որը նույնպես Եվրասիական տնտեսության միության ապրանք է, ԱԱՀ-ն չի հանվում: Կառավարությանը հարցնում է տնտեսագետ Արամ Գրիգորյանը, որը նաեւ «Հասարակական պաշտպանների միության» նախագահն է:
Նրա համոզմամբ, եթե գազի վրա գործող 20 տոկոս ԱԱՀ-ն հանվի, ապա սպառողների համար գազի սակագինը, միանշանակ, կնվազի:
Պարոն Գրիգորյանի մեկնաբանություններն առավել մանրամասն` տեսանյութում
Տնտեսագետը հաշվարկել է եւ պարզել, որ գազի գնի հնարավոր նվազման մի քանի տարբերակ էլ կա. «Եթե հաշվարկվի ռուսական վալյուտայով, ապա այդ դեպքում գազը սպառողների համար կնվազի, բայց Հայաստանն այնպիսի պայմանագիր է կնքել, որ գազի գինը հաշվարկվում է դոլարով»:
Գազի գնի նվազման մեկ այլ խոչընդոտ այս վառելիքի բնագավառում մենաշնորհն է:
Ըստ Արամ Գրիգորյանի, մեր երկրում գազի եւ էլեկտրաէներգիայի սակագները, ելնելով հասարակության սոցիալական վիճակից, բարձր են եւ կառավարությունն ամեն ինչ պետք է անի, որպեսզի գազի սպառողական գինը համապատասխանեցնի երկրի միջին աշխատավարձին, թոշակին ու նպաստին: Մինչդեռ ամսական միջին հաշվով 30-40 հազար դրամի գազ սպառող թոշակառուի թոշակը կազմում է 25 հազար դրամ:
Վառելիքի թանկ լինելու պատճառներից մեկն էլ տնտեսագետ Գրիգորյանը գտնում է, որ կապված է սակագինը հին մեթոդոլոգիայով հաշվարկելով. «10 տարի առաջվա մեթոդոլոգիայով ենք հաշվարկում, բայց մեթոդոլոգիան փոխելով սպառողների մոտ գնի նվազում կառաջանա»:
Կարդացեք նաև
Նրա կարծիքով, գազի գինը շարունակելու է բարձրանալ, քանի որ արտագաղթի եւ աղքատության թվի բարձրացման հետեւանքով վառելիքի սպառողները նվազում են:
Արամ Գրիգորյանի խոսքերով, Հանրային ծառայությունները կարգավորող հանձնաժողովն իրավունք ունի 6 ամիսը մեկ վերանայել գազի գինը` հաշվի առնելով վերոնշյալ նախադրյալները, սակայն, քանի որ, մեր երկրում գազի գինը որոշվում է քաղաքական իրավիճակից ելնելով, հանձնաժողովը նման քայլի չի դիմում:
Aravot.am-ը պետական եկամուտների կոմիտեից հետաքրքրվեց, թե
ինչո՞ւ ավտոմեքենաների պարագայում 20 % ԱԱՀ-ն չի գործում, գազի պարագայում` գործում է, այն դեպքում, երբ գազն էլ ԵՏՄ-ից ներկրվող ապրանք է: ՊԵԿ-ին խնդրել ենք մանրամասն ներկայացնել տարբերությունը, որի պատասխանը կներկայացնենք առաջիկայում:
Լուսինե ԲՈՒԴԱՂՅԱՆ
