Մարտի 30-ին ՀՀ քաղաքացիական ծառայության խորհրդի նախագահ Մանվել Բադալյանն ընդունեց Համաշխարհային բանկի՝ Հայաստանի «Պետական հատվածի արդիականացման» ծրագրի իրականացմանն աջակցող առաքելության խմբին։ Հանդիպման ընթացքում քննարկվեցին ծրագրի երկրորդ փուլի՝ քաղաքացիական ծառայության բաղադրիչի մասով նախատեսված ոլորտային բարեփոխումների ընթացիկ արդյունքները։
ՀՀ ՔԾԽ նախագահը ՀԲ-ին շնորհակալություն հայտնեց քաղծառայության համակարգի արդիականացմանը ցուցաբերվող նյութատեխնիկական, մեթոդական զգալի աջակցության համար։ Մանվել Բադալյանը նշեց, որ ծրագրով նախանշված բոլոր գործընթացները հիմնականում գտնվում են ավարտական փուլում։ Մասնավորապես՝ արդեն ավարտին են մոտենում քաղաքացիական ծառայողների հեռավար ուսուցման մոդուլների մշակման և նախապես ստեղծված ծրագրային պլատֆորմին համապատասխանեցնելու, մարդկային ռեսուրսների կառավարման տեղեկատվական էլեկտրոնային ծրագիրը Հայաստանի պետական կառավարման ոլորտում շահագործվող այլ էլեկտրոնային համակարգերին ինտեգրելու աշխատանքները։ Բացի դրանցից, քաղաքացիական ծառայության պաշտոնների գնահատման նոր մեթոդաբանության և չափորոշիչների մշակումից հետո պետական 5 մարմիններում իրականացվող պիլոտային ծրագրի շրջանակում ներկայումս փորձարկվում է դրանց էֆեկտիվությունը։ Արդյունքների վերլուծումից, ի հայտ եկած հնարավոր թերությունների շտկումից հետո գնահատման նոր համակարգը կգործարկվի ամբողջ ոլորտում։ Ընթացքի մեջ են նաև պետական մարմիններում քաղաքացիական ծառայության էթիկայի հանձնաժողովների արդյունավետության բարձրացմանն ուղղված աշխատանքները։
Երկուստեք գոհունակություն հայտնվեց ծրագրի իրականացման տեմպերի կապակցությամբ։ Պատվիրակության անդամները հույս հայտնեցին, որ դա լավ նախադրյալներ է ստեղծում ծրագրի հաջորդ փուլի համար։ Նրանք հետաքրքրվեցին նաև ընդունված «ՀՀ քաղաքացիական ծառայության բարեփոխումների ռազմավարություն»-ից, մասնավորապես այն կառուցակարգերից, որոնց ներդրմամբ անցում է արվելու արժանիքահեն քաղաքացիական ծառայության։
Գոռ Աբրահամյան
Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն
Ք Ա Ղ Ա Ք Ա Ց Ի Ա Կ Ա Ն Ծ Ա Ռ Ա Յ ՈՒ Թ Յ Ա Ն Խ Ո Ր Հ ՈՒ ՐԴ
