«Բոլոր դիտարկումները ընտրությունների վերաբերյալ սկսվում են՝ դրանք հիմնականում ժողովրդավարական չափանիշներին համապատասխանում էին, իսկ դրանից հետո ներկայացվում է մի ֆանտաստիկ լավ վերլուծություն` իրական թվերով ու դիտարկումներով, թե ինչ վատն ու թերի էին մեր ընտրությունները»,- նման դիտարկում արեց «Գլոբալիզացիայի եւ տարածաշրջանային համագործակցության վերլուծական կենտրոնի» ղեկավար Ստեփան Գրիգորյանը` հարց ուղղելով ԵԱՀԿ երեւանյան գրասենյակի ժողովրդավարացման ծրագրի ղեկավար Դեյվիդ Գուլետեին. «Այդ ավանդույթը կշարունակվի՞»:
Նա նաեւ հետաքրքրվեց`ԵԱՀԿ պաշտոնյայի կարծիքով ԸՕ-ի նախագծով առաջարկվող տարբերակը համամասնակա՞ն է, թե՞ խառը համամասնական: Ստեփան Գրիգորյանը կարծում է, որ այն խառը համամասնական տարբերակ է:
Դեյվիդ Գուլետեին նկատեց, որ ընտրական գործընթացները ԵԱՀԿ-ԺՄԻԳ-ի գործն է, բայց բացատրեց. «Եթե ի սկզբանե ասում ես` ամեն բան վատ է եւ հակասում է ժողովրդավարության սկզբունքներին, միանգամից փակում ես երկխոսության դուռը»: Ստեփան Գրիգորյանի երկրորդ հարցն անպատասխան մնաց:
Քննարկման մասնակիցներից մեկն էլ ուղիղ հարց տվեց ներկա դեսպաններին`եթե Հայաստանն անդամակցի ՆԱՏՕ-ին, այդ կառույցը կերաշխավորի՞ Հայաստանի անվտանգությունը:
Կարդացեք նաև
Հնչած ուղիղ հարցին՝ ՀՀ-ում Գերմանիայի դաշնային հանրապետության դեսպան Լուկաս Գասերը նույնքան ուղիղ էլ պատասխանեց. «Ոչ»:
Նելլի ԳՐԻԳՈՐՅԱՆ
