«Միացյալ Նահանգները անշուշտ կցանկանար այս միջոցառումն օգտագործել նախագահների հանդիպում կազմակերպելու համար, որովհետեւ իրենց ստրատեգիան է դա»,- մարտի 30-ին «Մեդիա կենտրոնում» լրագրողների հետ հանդիպման ընթացքում ասաց Միջազգային եւ անվտանգության հարցերի հայկական ինստիտուտի հիմնադիր, քաղաքագետ Ստյոպա Սաֆարյանը:
Նա հասկանալի է համարում, թե ինչու ԱՄՆ-ն նման Սարգսյան-Ալիեւ հանդիպման մասին չի հայտարարում. «Կարծում եմ՝ այս պահի դրությամբ առավելապես այն պատճառով, որ դա հնարավոր չեղավ կազմակերպելը եւ Ադրբեջանը փաստացի հրաժարվում է ուղղակի վերականգնել բանակցային ֆորմատը: Եվ հետեւաբար՝ չի կարելի հայտարարել մի բան, որը լավագույն դեպքում մնալու է ցանկության մակարդակում եւ իրականություն չի դառնալու, առավել եւս, եթե նկատի առնենք այն հանգամանքը, որ ո՛չ Ադրբեջանը, ո՛չ Հայաստանը Ռուսաստանի կազմակերպած հանդիպումների ընթացքում խուսափելու որեւէ փորձեր չեն կատարում: Բայց ի նկատի ունենալով հակամարտության վրա, համեմատած Ռուսաստանի, Միացյալ Նահանգների ավելի քիչ ազդեցությանը, բնականաբար, դա տեղի է ունենում հենց Միացյալ Նահանգների կամ արեւմտյան համանախագահների միջնորդական առաքելությունների պայմաններում: Հետեւաբար՝ խնդիրը, միանշանակ, Ադրբեջանի հետ է կապված»:
Նա նկատեց, որ Ադրբեջանի ցանկություններից մեկն է փոխել ԵԱՀԿ Մինսկի խմբի ձեւաչափը. «Պիտի խոստովանել, որ այս կտրվածքով Ադրբեջանը միայնակ չէ: Եթե նա միայնակ լիներ իր այս շահագրգռվածության մեջ, բնականաբար, այդ խնդիրը լուծելը քաղաքական եղանակներով շատ ավելի հեշտ կլիներ, բայց Մինսկի խմբի վերաֆորմատավորմամբ շահագրգռված է Թուրքիան, գրեթե նույն տեսքով, ինչ Ադրբեջանը, բնականաբար, իրեն տեսնելով այդ խմբի հնարավոր համանախագահներից մեկը: Եվ նաեւ Մինսկի խմբի դիրքերի ուժեղացմամբ շահագրգռված չէ, պետք է խոստովանել, մեր ռազմավարական դաշնակիցը՝ Ռուսաստանը: Ես չեմ ուզում ասել, որ Ռուսաստանը իսպառ կցանկանար Մինսկի խմբի լուծարում, այս պահին նաեւ շահագրգռվածություններ կան, բայց նաեւ հաստատապես մենք կարող ենք մի բան վստահաբար պնդել, որ Ռուսաստանը Մինսկի խմբին զուգահեռ ստեղծել է մի ձեւաչափ: Ռուսաստանը այդ ձեւաչափով ընդգծում է ոչ միայն իր առավել դոմինանտությունը Մինսկի խմբի մյուս համանախագահ այլ երկրներից, այլ նաեւ նույն այդ ձեւաչափով կարողանում է չափազանց տեսանելի եւ շոշափելի ազդեցություն ունենալ տարածաշրջանի վրա»:
Ամի ՉԻՉԱԿՅԱՆ
Կարդացեք նաև
Լուսանկարը՝ «Մեդիա կենտրոնի»:
