ԱԱԾ քննչական վարչության պետի առաջին տեղակալ, քրեական գործով քննչական խմբի ղեկավար Միքայել Համբարձումյանն այսօր «Արմենպրես» մամուլի սրահում ուշագրավ լուսանկարներ ցուցադրեց ԱԱԾ-ի կողմից հայտնաբերված հանցավոր խմբի հետ կապված:
Պարզվում է՝ հանցավոր խումբը տեղեկություններ է հավաքել անխտիր բոլոր պատգամավորների, քաղաքական գործունեությամբ զբաղվողների մասին. «Այդ տեղեկությունները պարունակում են քաղաքական գործչի վերաբերյալ կենսագրական տվյալներ, նրա ընտանիքի անդամների վերաբերյալ տեղեկություններ, ընտանիքի կազմը, «Google» ծրագրով նրա բնակության վայրի հասցեները: Տեղեկություններ են հավաքվել նաեւ նախախորհրդարանական կազմակերպության վերաբերյալ:
Խումբը իր առջեւ խնդիր է դրել նաեւ տեղեկություններ հավաքել գործարար անձանց վերաբերյալ: Տեսագրել է ՀՀ առաջին նախագահի առանձնատունը, դրա մատույցները, ինչպես նաեւ ՀՀ երկրորդ նախագահի գործունեության վայրի հետ կապված ուսումնասիրություններ: Վերահսկել է ՀՀ գործող նախագահի թիկնազորի աշխատանքի հետ կապված հանգամանքները, թե ինչպես են կազմակերպում: Խոսքը նախագահի անվտանգության մասին է:
Խմբի անդամները, կոնկրետ Արթուր Վարդանյանը եւ խմբի այլ անդամներ մասնակցել են Գյումրիում տեղի ունեցած Հայ կաթողիկե եկեղեցու բացմանը եւ գաղտնի տեսանկարահանել են գործող նախագահի ժամանումն այնտեղ: Արթուր Վարդանյանը կրել է եկեղեցու երգչախմբի հագուստ՝ չնկատվելու համար»:
Կարդացեք նաև
Ընդ որում, ուշագրավ է, որ Միքայել Համբարձումյանը ցուցադրեց նաեւ այդ երգչախմբի հագուստով Արթուր Վարդանյանի լուսանկարը, որը կասկածների տեղիք է տալիս՝ ինչպե՞ս կարող էր անձը, որը պլանավորում է նման լուրջ գործողություն, ծպտվի եկեղեցականի հագուստի տակ ու մի բան էլ ժպիտով լուսանկարվի դեպքի վայրում:
Հայտնաբերվել է նաեւ տեսագրություն, որտեղ Արթուր Վարդանյանն ուղերձով է դիմում քաղաքացիներին: Այդ տեսագրությունը նախատեսված է եղել եթեր հեռարձակել՝ Հ1-ը գրավելուց հետո:
Հայտնաբերվել է նամակ, որտեղ բոլոր դեսպաններին հրավիրում են «Արմենիա» հյուրանոցում ժողովի մասնակցել՝ արդեն ահաբեկչական ակտը կատարելուց հետո: Դեսպաններին պետք է ներկայացվեր, թե որն է եղել իրենց նպատակը: Նախաքննական գաղտնիքից ելնելով՝սրա այլ հանգամանքներ չեն հրապարակվում:
Հռիփսիմե ՋԵԲԵՋՅԱՆ
