Ինչպես տեղեկացնում են Գյումրի բժշկական կենտրոնի հասարակայնության ու լրատվության բաժնից, այսօր գիշեր՝ ժամը 00:10-ին իրենց մոտ են ընդունվել կտրած-ծակած գործիքով վնասվածքներ ստացած քաղաքացիներ: Վերջիններս Երեւանի բնակիչներ են՝ 1980 թվականին ծնված Ա.Մ.-ն է, որի մոտ ախտորոշվել է կրծքավանդակի առաջնային պատի կտրած-ծակած թափանցող վերքեր եւ 1989 թ ծնված Ն.Դ.-ն է, որի մոտ ախտորոշվել է կրծքավանդակի ձախ կեսի թափանցող ծակած կտրած վերք, աջ կեսի չթափանցող ծակած կտրած վերք, ձախ դաստակի կտրած վերք:
Տուժածները ստացել են համապատասխան բուժօգնություն: Ներկայումս բժիշկները նրանց առողջական վիճակը գնահատում են կայուն, նրանք գտնվում են վերակենդանացման բաժանմունքում:
Ըստ տեղեկությունների, դանակահարությունը տեղի է ունեցել Գյումրու «Վանատուր» ռեստորանի դիմաց. երիտասարդները պասից դուրս գալու առիթով հավաքվել են կուրսեցի մի քանի ընկերներով, կերել, խմել ու կռիվ էին արել: Մայրաքաղաքից եկած երիտասարդներին դանակահարել է նրանց համակուրսեցին, որը գյումրեցի է:
Շիրակի մարզի դատախազությունից տեղեկացանք, որ հարուցվել է քրեական գործ ՀՀ Քրեական օրենսգրքի 112 հոդվածի՝ 2-րդ մասի 1-ին կետով:
Կարդացեք նաև
Հոդված 112-ը, որը կոչվում է. Դիտավորությամբ առողջությանը ծանր վնաս պատճառելը , սահմանում է.
1. Դիտավորությամբ մեկ ուրիշին մարմնական վնասվածք պատճառելը կամ առողջությանն այլ ծանր վնաս պատճառելը, որը վտանգավոր է կյանքի համար կամ առաջացրել է տեսողության, խոսքի, լսողության կամ որեւէ օրգանի կամ օրգանի ֆունկցիայի կորուստ կամ արտահայտվել է դեմքի անջնջելի այլանդակմամբ, ինչպես նաեւ կյանքի համար վտանգավոր այլ վնաս է պատճառել առողջությանը կամ առաջացրել է դրա քայքայում՝ զուգորդված ընդհանուր աշխատունակության ոչ պակաս, քան մեկ երրորդի կայուն կորստով կամ հանցավորի համար ակնհայտ մասնագիտական աշխատունակության լրիվ կորստով կամ առաջացրել է հղիության ընդհատում, հոգեկան հիվանդություն, թմրամոլությամբ կամ թունամոլությամբ հիվանդացում՝
պատժվում է ազատազրկմամբ՝ երեքից յոթ տարի ժամկետով:
2.Նույն արարքը, որը կատարվել է՝
1) երկու կամ ավելի անձանց նկատմամբ, պատժվում է ազատազրկմամբ՝ հինգից տասը տարի ժամկետով:
Նունե ԱՐԵՎՇԱՏՅԱՆ
