«Ոչ մի դրական տեղաշարժ չկա, եւ դժվար էլ թե մենք կարողանանք սպասել ապագայում: Եվրասիական տնտեսական միություն հիմնած Ռուսաստանի տնտեսությունը գտնվում է խորը ճգնաժամի մեջ, եւ ընթացիկ իրադարձությունները ցույց են տալիս, որ իրավիճակից դուրս գալու որեւէ ծրագիր Ռուսաստանի ղեկավարությունը իրականում չունի: Ռուսական տնտեսությունը ամբողջապես եւ հիմնովին կախված է նավթի գնից, եւ կոռումպացված ու ոչ պրոֆեսիոնալ ղեկավարության ավտորիտար քաղաքականությունը բերում է նրան, որ ոչ ազատ ձեռնարկատիրություն, ոչ էլ զարգացած արտադրություն Ռուսաստանում պարզապես չկա»,- «Առավոտի» հետ զրույցում ասաց ռուս հրապարակախոս Քսենյա Կիրիլովան` խոսելով Հայաստանի քաղաքական իշխանության մեկ գիշերում կայացրած որոշման՝ Եվրամիության հետ ասոցացման պայմանագրի կնքումը չեղարկելու եւ ռուսական ինտեգրացիոն նախագծերին միանալու մասին:
«Հայաստանի եւ Մաքսային միության այլ երկրների համար այս իրավիճակը կարող է ունենալ ոչ միայն ֆինանսական խնդիրներ, այլ նաեւ հավանականություն, որ չունենալով տնտեսական հնարավորություններ իր միությունում ընդգրկված երկրներին տնտեսապես ապահովելու համար՝ Ռուսաստանը կսկսի ինտենսիվորեն օգտագործել այլ լծակներ: Մոսկվայի վարքագծի ամենավախենալու օրինակը կարող ենք տեսնել՝ հետեւելով Ուկրաինայում տեղի ունեցածին»,- հավելեց Քսենյա Կիրիլովան:
«Առավոտ» օրաթերթ
29.03.2016
