Ինչպես ավելի վաղ հայտնել էինք, Երեւանի Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանը մերժել էր բանակում զոհված զինծառայողներ Արթուր Ղազարյանի եւ Վալերի Մուրադյանի մայրերի՝ Իրինա Ղազարյանի ու Նանա Մուրադյանի բողոքն ընդդեմ ոստիկանների:
2015թ. մայիսի 13-ին ոստիկանները բռնություն կիրառելով` հեռացրել էին նախագահականի դիմաց բողոքի ակցիա իրականացնող Իրինա Ղազարյանին եւ Նանա Մուրադյանին: Մայրերն էլ դիմել էին դատարան` պահանջելով անաչառ քննել ոստիկանների գործողությունները:
Այսօր էլ մայրերի բողոքը մերժեց նաեւ Վերաքննիչ դատարանը: Իրինա Ղազարյան, ի դեպ, դատական նիստին ներկայանալ չէր կարողացել, այնուամենայնիվ տեղեկացել է, որ դատավորը «ոչ մի խնդիր չի տեսնում». «Նանա Մուրադյանն ասել է` տեսանյութում պարզ երեւում է, որ ոստիկանները քաշքշել են մեզ, անդամ Նանայի կուրծքն են սեղմել, ինչի հետեւանքով նա էլ ցավեր ունի: Իսկ իրենց համար այս ամենը մեկ է: Հերիք չի` մեր երեխաների կյանքն են խլում, մի բան էլ նման բան են ասում»,- Aravot.am-ի հետ զրույցում ասաց դատարանի որոշումից դժգոհ կինը:
Տիկին Ղազարյանը հայտնեց, որ գտնվում է «Սուրբ Գրիգոր Լուսավորիչ» ԲԿ-ում. «Երբ ոստիկանները ձախ ձեռքիցս քաշեցին, նյարդի բորբոքում սկսվեց, ցավը չի թողնում: 10 օր է` հիվանդանոցում եմ: Սեղմել են երակիս, կենտրոնական նյարդի բորբոքում է սկսվել: Ձեռքս ամբողջությամբ թուլացել է: Էլ մերսումներ, «տոկեր»… որ «պրիստուպ» է սկսվում, սպանում է…: Պարբերաբար հիվանդանոց եմ պառկում»:
Կարդացեք նաև
Լուիզա ՍՈՒՔԻԱՍՅԱՆ
