ՀԱԿ խմբակցության ղեկավար Լեւոն Զուրաբյանն այսօր հրավիրած ասուլիսում խոսելով «4+4+4» ձեւաչափով Ընտրական օրենսգրքի քննարկումների մասին, առաջարկել էր ՀԱԿ խմբակցության պատգամավորներին, որ մասնակցեն իրենց խմբակցությունից պատվիրակի ընտրման քննարկմանը եւ իրենց տեսակետը ներկայացնեն: Նրա խոսքերով՝ «7 պատգամավորից 6-ը, ըստ էության, միացել են միասնական պլատֆորմին՝ այդ 5 պահանջներին: Լյուդմիլա Սարգսյանի դիրքորոշումը չգիտենք, որեւէ կերպ չի արտահայտվում, մնացած 6-ի տեսակետը գիտենք»:
Aravot.am-ի հետ զրույցում Լյուդմիլա Սարգսյանը պատասխանեց. «Ես էլ եմ կողմ արտահայտվել պահանջներին, հետեւաբար Լեւոն Զուրաբյանը կամ լավ չի հետեւում դեպքերի զարգացումներին, կամ ուղղակի փորձում է խեղաթյուրել: Թող ինքը չփորձի դա վերագրել խմբակցությանը: Դա մեր առանձին կուսակցության կարծիքն է եւ որեւէ կապ չունի խմբակցության որոշումների հետ: Թող բարի լիներ այսուհետեւ չնույնացնել, որովհետեւ խմբակցության այն անդամները, ովքեր այսօր իրենց հետ շփման մեջ չեն, դա իրենց վաստակն է, որ չենք շփվում: Հետեւաբար, նրանք մեր կարծիքը չպետք է նույնացնեն իրենց հետ, որովհետեւ մենք դրա հետ համակարծիք լինելով՝ առանձին ներկայացրել ենք այլ պահանջներ եւս, որը հրապարակել ենք: Հետեւաբար, իրենց ձեւաչափի մեջ մենք չենք տեղավորվում, իրենք 5 պահանջ են ներկայացնում, մենք՝ 11»:
Ինչ վերաբերում է 4+4+4» ձեւաչափով քննարկման համար պատվիրակի ընտրության հրավերին, Լյուդմիլա Սարգսյանը պատասխանեց. «Կարիք չկա նման հրավեր ուղարկելու: Դրա համար գոյություն ունի հեռախոս, որով կարելի է զանգել, կարծիք իմանալ ու հրավիրել: Իսկ եթե պատվիրակ ընտրվեմ ես, ի՞նչ կերպով են վերաբերվելու դրան ՀԱԿ կուսակցությունում: Իրենք արդեն ունեն իրենց ներքին որոշումը, թե ով պիտի մասնակցի այդ ձեւաչափին եւ ձեւական բաների հետեւից էլ չեմ ցանկանում ընկնել»:
Հռիփսիմե ՋԵԲԵՋՅԱՆ
