Երուսաղեմի հայկական և ռուսական սրբավայրերը ներկայացնող 60-ից ավելի եզակի լուսանկարներ Սանկտ Պետերբուրգի Կրոնների պատմության պետական թանգարանից բերվել են Հայաստան:
19-րդ դարավերջի և 20-րդ դարասկզբի հայտնի լուսանկարիչներ Ֆ. Բոնֆիսի, Բ. Գենտշելի, Ի. Բարշչևսկու և այլոց կողմից նկարված լուսանկարներն այսօրվանից մինչև մայիսի 5-ը կցուցադրվեն ՀՀ քաղաքաշինության նախարարության Ճարտարապետության թանգարան-ինստիտուտում:
«Երուսաղեմի ռուսական և հայկական սրբավայրերը» խորագրով ցուցահանդեսում ներկայացված են, օրինակ, Ջաֆֆայի դարպասները, Սուրբ Հակոբյանց մայր տաճարը, Սիոնյան դարպասները, Եղիզաբեթյան վանատունը, Սուրբ Ալեքսանդր Նևսկու եկեղեցին և այլն:
Կարդացեք նաև
Լրագրողների հետ ճեպազրույցում Սանկտ Պետերբուրգի Կրոնների պատմության պետական թանգարանի ավագ գիտաշխատող Ելենա Նիկոլաևնան նկատեց, որ ներկայացված լուսանկարները հնարավորություն են տալիս համեմատելու 19-րդ դարավերջի, 20-րդ դարասկզբի և այսօրվա սրբավայրերը: Ցուցահանդեսում կան նաև լուսանկարներ, որոնցում պատկերված հուշարձանները չեն պահպանվել:
«Լուսանկարներն առաջին անգամ են ցուցադրվում Հայաստանում: Դրանցից շատերը նույնիսկ Ռուսաստանում չեն ներկայացվել: Երուսաղեմի ճարտարապետական հուշարձանները, հայկական և ռուսական տաճարների գեղարվեստական հարդարանքը ներկայացնող այս ցուցահանդեսը հնարավորություն է տալիս յուրահատուկ վիրտուալ ճանապարհորդություն կատարել Երուսաղեմի սրբավայրերով»,- նշեց ՀՀ քաղաքաշինության նախարարության Ճարտարապետության թանգարան-ինստիտուտի տնօրեն Անուշ Տեր-Մինասյանը:
Սիրանուշ ՀԱՅՐԱՊԵՏՅԱՆ
