«Իսլամական դիմադրությունը մոտեցել է վերջին` խալիֆայության ստեղծման փուլին, ինչը դրեց իսլամական հասարակության շոշափելի մոդելի հիմքը: Իսլամիստները համարում են, որ ստեղծել են իրենց պատկերացրած իսլամական արդարացի պետությունը»,-այսօր «Նոյան Տապան» լրատվական գործակալության մամուլի սրահում ասաց ԵՊՀ դասախոս, կրոնագետ, աստվածաբան Վարդան Խաչատրյանը:
Խոսելով եվրոպական երկրներում եւ Մերձավոր Արեւելքում իսլամական, մասնավորապես «Իսլամական պետություն» եւ «Թալիբան» ահաբեկչական խմբավորումների կազմակերպած ահաբեկչություններից, նա նշեց, որ ըստ իսլամիստների` քաղաքական դրդապատճառներով եւ կրոնական քողի ներքո իրականացրած բռնարարքները կարող են ազդել այն ժողովուրդների եւ երկրների վրա, որոնց ռազմական մեքենան դեռ հաղթահարելի չէ իրենց համար. «Իսլամի գաղափարախոսության հիմքում ընկած է իսլամն առավելագույնս աշխարհում տարածելը, իսկ մյուս կրոնները կարող են գոյություն ունենալ երկրորդական կարգավիճակում: Իսլամիստական խմբավորումների պատերազմական գործողությունները լոկալիզացված են ահաբեկչական դրսեւորումների մեջ, եւ նրանք համոզված են, որ այդպես հաջողություն են ունենալու»:
Կրոնագետի խոսքով` Հայաստանը եւս ներքաշված է այս պայքարի մեջ եւ թուրքալեզու իսլամի ամբողջականացման ճանապարհին որպես խոչընդոտ է դիտվում. «Դեյր Զորի եկեղեցու պայթեցումը պատվեր էր: Շատ լուրջ ու խորն է այս խնդիրը»: Խաչատրյանը նկատեց, որ միջազգային հանրությունը դեռ պատրաստ չէ ճանաչել, որ Թուրքիան ահաբեկչական շարժումների բազա է:
Անդրադառնալով Բրյուսելում տեղի ունեցած ահաբեկչական գործողություններին, որոնց զոհ գնաց 34 մարդ, բանախոսը նշեց, որ այդ պայթյունների կազմակերպման գործում փախստականներ ներքաշված չեն. «Թուրքիան ասում է, որ զգուշացրել է, որ Բրյուսել է եկել մեկ, հետո` մեկ այլ ահաբեկիչ: Բրյուսելն էլ ասաց, որ նման զգուշացում չի եղել: Հետո Թուրքիան հայտարարեց, որ այդ մարդուն դեպորտ են արել ոչ թե Բելգիա, այլ Հոլանդիա: Ու ոչ մեկ չի մտածում, թե Բրյուսելի անձնագրով մարդն ինչո՞ւ է ուղարկվում Հոլանդիա: Ի՞նչն էր զգուշացված: Պարզ չի՞, որ այդ մարդը Հոլանդիայից մտել է Բելգիա»:
Կարդացեք նաև
Խոսելով այսօր EgyptAir ավիաընկերության առևանգված օդանավի միջադեպի մասին, Վարդան Խաչատրյանն ասաց, որ դա ահաբեկչություն չէ, քանի որ ահաբեկչություն են համարվում քաղաքական գաղափարախոսությամբ եւ քաղաքական նպատակներով իրականացված բռնարարքները:
Լուիզա ՍՈՒՔԻԱՍՅԱՆ
