Բրյուսելում անցած շաբաթ կայացած Արեւելյան գործընկերության «Եվրանեսթ» խորհրդարանական վեհաժողովի հինգերորդ լիագումար նիստի աշխատանքների արդյունքում, ինչպես հայտնի է, Քաղաքական հանձնաժողովի նիստում զեկույց է ընդունվել, որի համահեղինակը նաեւ վեհաժողովում հայաստանյան պատվիրակության ղեկավար Արտակ Զաքարյանն է: Այսօր կայացած մամուլի ասուլիսում պարոն Զաքարյանը տեղեկացրեց, որ այդ զեկույցում առաջին անգամ հղում է արվում 1994-ին Հայաստանի, Ադրբեջանի եւ ԼՂՀ-ի միջեւ կնքված զինադադարի համաձայնագրին, զինադադարի պահպանմանը: Առանձին կետով խոսվում է նախագահների հանդիպման, հարցի խաղաղ կարգավորմամբ լուծման, ԵԱՀԿ Մինսկի խմբի գործունեության անհրաժեշտության, փակ սահմանների առկայության մասին:
Արևելյան գործընկերության «Եվրանեսթ» խորհրդարանական վեհաժողովի հինգերորդ լիագումար նիստի աշխատանքներին մասնակցելու նպատակով Բրյուսելում էին «Եվրանեսթ» ԽՎ-ում ՀՀ ԱԺ պատվիրակության ղեկավար Արտակ Զաքարյանը, պատվիրակության անդամներ Միքայել Մելքումյանը, Թեւան Պողոսյանը, Հրանտ Բագրատյանը, Մհեր Շահգելդյանը, Կարինե Աճեմյանը և Վահե Էնֆիաջյանը:
«Քաղաքական խմբերում հիմնական համաձայնություններն ենք ձեռք բերել`ընդհանրական ձեւակերպումների շուրջ»,- ասաց Արտակ Զաքարյանը: Խոսքն այն մասին է որ Ուկրաինան, Վրաստանը եւ այլք կողմ են տարածքային ամբողջականության սկզբունքին:
Մարդու իրավունքների սկզբունքի պաշտպանության հարցում Հայաստանն այդ հարթակում միայնակ է մնում, ինչը կարող է Ադրբեջանի կողմից լավագույնս օգտագործվել եւ շահարկվել: Արտակ Զաքարյանը տեղեկացրեց, որ ԼՂՀ հարցի վերաբերյալ առանձին զեկույց էր պատրաստվել, որը վերջին պահին դուրս է բերվել օրակարգից: Բայց, ըստ բանախոսի, այն իր դերն արդեն խաղացել էր:
Կարդացեք նաև
«Մեր պատվիրակությունը վերապահումներ ուներ այն հարցերում, որոնք ուղղված էին ՌԴ շահերին եւ մեր անվտանգության հարցերին: Մեր պատվիրակությունը դեմ է քվեարկել դրանց: ԼՂՀ հարցին առնչվող անհամաձայնություններ են եղել՝ ընդհանուր ձեւակերպումների համատեքստում, մեր պատվիրակությունը պատրաստ է եղել իր վետոյի իրավունքը կիրառել, բայց բանը դրան չի հասել, այդ առաջարկները ետ են վերցվել: Բոլոր չորս զեկույցներն ունեն մաքուր բնույթ»,- մանրամասնեց Արտակ Զաքարյանը`հավելելով, որ մեր պատվիրակներն այս առումով բավական ակտիվ աշխատել են հանձնաժողովներում, կուլիսային քննարկումներում:
Ադրբեջանն, ինչպես հայտնի է, յոթ ամիս է դիմում է ներկայացրել «Եվրանեսթից» դուրս գալու համար: Անցած տարի ադրբեջանական պատվիրակությունը չմասնակցեց վեհաժողովի Երեւանում կայացած նիստին, թեպետ հայաստանյան պատվիրակությունը Բաքվում մասնակցել էր վեհաժողովի նիստին:
Հայաստանյան պատվիրակության անդամ Թեւան Պողոսյանն ասում է, որ ադրբեջանական պատվիրակության բացակայությունը պարապուրդի չի մատնել մեր պատվիրակներին: Հայաստանյան պատվիրակությունն, ըստ պատգամավորի, նախահարձակ գործեց`փորձելով նաեւ այդ հարթակում ապացուցել, որ Հայաստանն ու Ադրբեջանը «զույգ» չեն: Ավելին, բացարձակ տարբերվող մոտեցումներ եւ ընկալումներ ունեն: Թեւան Պողոսյանի կարծիքով, կարողացել են ամրագրել այն գիտակցությունը, որ «Եվրանեսթը» մեզ համար ԼՂՀ հարցի լուծման հարթակ չէ, այն իր առաքելությունն ունի`եվրոպական արժեքների ամրագրում, մշակույթի տարածում եւ այլն:
Եվրանեսթի պատվիրակությունն առաջիկայում պատրաստվում է մեկնել Բաքու`ադրբեջանական պատվիրակությանը հորդորելու՝ ետ վերցնել դիմումը: Պատվիրակության անդամների հետ զրույցում Արտակ Զաքարյանը համաձայնության է եկել, որ Բաքու մեկնելու իրենց գինը չպիտի լինի որեւէ խոստում ՀՀ-ի կամ ԼՂՀ-ի հետ կապված ինչ-որ բանաձեւ:
Նելլի ԳՐԻԳՈՐՅԱՆ
