Տավուշի մարզի սահմանամերձ Բաղանիս գյուղում կառուցվում է խմելու ջրագիծ: Բաղանիսի գյուղապետ Նարեկ Սահակյանը հայտնեց, որ «ԻՖԱԴ» կազմակերպության կողմից ֆինանսավորվող ծրագրի արժեքը կազմում է 263 միլիոն դրամ, ծրագրի գումարի 10 տոկոս ներդրումը սահմանամերձ համայնքի փոխարեն կատարում է «Գրանդ հոլդինգը», «Վարդանյաններ» հիմնադրամը: Շինարարական աշխատանքները կատարում է «Բլեսկ» ՍՊԸ-ն:
Գյուղապետն ասաց, որ կառուցվող ջրագծի երկարությունը, ներառյալ ներքին ցանցը, 16 կմ է: « Յոթ աղբյուր» տեղանքից ջուրը Բաղանիս հասցնելու համար կառուցվում է 200 եւ 50 տոննա տարողությամբ օրվա կարգավորիչ ջրամբարներ: Կտեղադրվեն ջրաչափեր, սահմանամերձ գյուղի բնակիչները օրական 20-24 ժամ ջուր կունենան:
Ն. Սահակյանի խոսքերով՝ նախատեսված է ծրագիրն ավարտել մայիսի 31-ին, սակայն այն ավելի շուտ կիրականացվի:
Ոսկան ՍԱՐԳՍՅԱՆ
