Թուրքիայի նախագահ Ռեջեփ Թայիփ Էրդողանն իր ելույթներից մեկում դժգոհություն էր հայտնել, որ Ստամբուլում հավատարմագրված եվրոպացի հյուպատոսները մասնակցել էին «Ջումհուրիեթ» թերթի գլխավոր խմբագիր Ջան Դյունդարի և նույն լրատվամիջոցի թղթակից Էրդեմ Գյուլի դատավարությանը։ Այս մասին տեղեկացնում է թուրքական «Հաբերլեր» լրատվական գործակալությունը։
Էրդողանի արտահայտած դժգոհության վերաբերյալ հայտարարություն է տարածել Իտալիայի Արտաքին գործերի նախարարությունը։ Հայտարարության մեջ մասնավորապես ասվում է, որ եվրոպացի դիվանագետների հետաքրքրությունը Թուրքիայի դատաիրավական համակարգի և մասնավորապես երկու լրագրողների աղմկահարույց դատավարության նկատմամբ տեղավորվում է Թուրքիա-ԵՄ գործընթացի շրջանակներում և եվրոպացիներն ուզում են տեսնել, թե ինչ վիճակում է մի երկրի արդարադատության համակարգը, որը ուզում է անդամակցել Եվրամիությանը։
Տեղեկացնենք, որ լրագրողների դատավարությանը ներկա է եղել Թուրքիայում Գերմանիայի արտակարգ և լիազոր դեսպան Մարտին Էրդմանը, ինչպես նաև Ստամբուլում դիվանագիտական առաքելություն իրականացնող Անգլիայի, Կանադայի, Շվեյցարիայի, Գերմանիայի, Իտալիայի, Հոլանդիայի, Ավստրիայի, Ֆինլանդիայի, Ֆրանսիայի և Լեհաստանի հյուպատոսները։
Թուրքական «Ջումհուրիեթ» լրատվամիջոցի լրագրող Ջան Դյունդարն ու Էրդեմ Գյուլը 2015թ. նոյեմբերի 26-ին կանչվել էին Ստամբուլի դատախազություն՝ հարցաքննության, որի ժամանակ լրագրողներին տեղեկացվել էր դատախազության որոշումը՝ նրանց կալանավորելու մասին։ Դյունդարին և Գյուլին մեղադրանք էր առաջադրվել «Պետության անվտանգությանը վերաբերվող փաստերի հրապարակման, քաղաքական և զինվորական լրտեսության, գաղտնի փաստեր հրապարակելու համար»
Կարդացեք նաև
։ Մեղադրանքի հիմք էին հանդիսացել նրանց հրապարակած մի քանի լուսանկարները, որտեղ հստակորեն երևում է, որ Թուրքիայի Ազգային հետախուզության ծառայության (MİT) բեռնատարները բեռնված են եղել զինամթերքով, որը պետք է հասներ Սիրիայի հյուսիսի թուրքմեններին։
Երկրի իշխանությունները երկար ժամանակ պնդում էին, որ բեռնատարները, տանում էին բացառապես մարդասիրական օգնություն։
Երկու լրագրողները անազատության մեջ մնացին 92 օր, որից հետո փոխվեց նրանց նկատմամբ խափանման միջոցը։ Դատական գործընթացը դեռևս շարունակվում է։
Հ.Գ. Ջան Դյունդարի անձնական կայքում, ի թիվս այլ հոդվածների, տեղադրված են մի քանի ծավալուն հոդվածներ, որտեղ լրագրողը անդրադարձել է հայ-թուրքական հարաբերություններին։ Հատկապես հետաքրքիր մանրամասներ է պարունակում Դյունդարի հոդվածը Լևոն Տեր-Պետրոսյանի և Ալփարսլան Թյուրքեշի (այս անձը «Գորշ գայլերի» գաղափարական հայրն է, Ազգայնական շարժում կուսակցության հիմնադիրը, բացի այդ Թուրքիայի փոխվարչապետ Թուղրուլ Թյուրքեշի հայրն է:)
1993թ. մարտի 12-ին, սփյուռքահայ Սամսոն Օզարարատի միջնորդությամբ, Փարիզում կայացած հանդիպմանը ներկա է եղել նաև Թուրքիայի ներկայիս փոխվարչապետ Թուղրուլ Թյուրքեշը՝ Ալփարսլանի որդին (տե´ս լուսանկարում):
