«Ցանկացած մարդ իրավունք ունի իր կարծիքը հայտնելու։ Բայց նրանք կարգ են խախտել, որի համար սահմանված է համապատասխան տույժ։ Եթե դա լիներ Եվրոպայի առաջնության կամ Աշխարհի առաջնության որակավորման փուլի խաղի ընթացքում, հաստատ ֆինանսական շատ մեծ տույժեր կլինեին»,- այս մասին Aravot.am-ի հետ զրույցում ասաց «Ֆուտբոլ 365» շաբաթաթերթի գլխավոր խմբագիր Գեւորգ Բուռնուչյանը։
Հիշեցնենք, որ մարտի 25-ին Հայաստանի եւ Բելառուսի միջեւ տեղի ունեցած խաղի ընթացքում ճայթուկով խաղադաշտ ներխուժեց մի երիտասարդ, որն, ինչպես հետո պարզվեց, Առաջին հայկական ճակատի (FAF) անդամ է։
Գեւորգ Բուռնաչյանն ասաց, որ բողոքի այլ ձեւեր գոյություն ունեն. «Հաշվի առնելով մեր երկրի ֆինանսական վիճակը, կարծում եմ՝ պաշտոնական խաղում այդպիսի բան անելը շատ մեծ ֆինանսական հետեւանքներ կունենար եւ անընդունելի է»։
FAF-ի անդամները մարտի 21-ին «Նոյյան տապան»-ի մամուլի սրահում տեղի ունեցած ասուլիսի ընթացքում հայտարարել էին, որ որոշել էին պաստառներ պատրաստել ու իրենց երախտիքի խոսքն ասել հավաքանականում իր վերջին խաղն անցկացնող դարպասապահ Ռոման Բերեզովսկուն, սակայն նրանց արգելել են մարզադաշտ մտնել. «Լեգենդը գնում է առանց մեր ծափերի»,- ասել էր FAF-ի անդամ Էդգար Խաչատրյանը։
Կարդացեք նաև
«Ֆուտբոլ 365» շաբաթաթերթի գլխավոր խմբագրի հետաքրքրվեցինք, թե ինչպես է վերաբերվում այս հայտարարությանը հաշվի առնելով այն, որ Բերեզովսկուն նվիրված ակցիա, համենայն դեպս եղավ, «Red Eagles»-ի անդամները պաստառներ էին փակցրել. «Գիտեք արդեն էմոցիաներն, այդ հայտարարություններն այնքան շատ են եղել ու արդեն մի քիչ աբսուրդի աստիճանի է հասնում։ Եկեք այդ էմոցիաները մի կողմ թողնենք եւ շատ լուրջ չվերաբերվենք դրանց»։
Աշոտ ԻՍՐԱԵԼՅԱՆ
