«Հիմա սահմանային իրավիճակն անհամեմատ ավելի հանգիստ է։ Երկու օր լարված էր, իսկ այսօր հանգիստ է»,- այս մասին Aravot.am-ի հետ զրույցում ասաց ՀՀ պաշտպանության նախարարի մամուլի քարտուղար Արծրուն Հովհաննիսյանը։
Հիշեցնենք, որ մարտի 26-ին Ադրբեջանի կողմից ՀՀ սահմանագոտու ամբողջ երկայնքով, ինչպես նաև ԼՂՀ ՊԲ պատասխանատվության գոտում ինտենսիվորեն կիրառվել են ինչպես հրաձգային զենքեր, այնպես էլ 60 և 82 մմ-ոց ականանետեր և ՏՌ-107 համազարկային հրթիռային կայանքներ:
Պաշտպանության նախարարությունը հաղորդագրություն էր տարածել, որ ՀՀ զինված ուժերը և ԼՂՀ ՊԲ ստորաբաժանումներն անցել են զինված դիմակայության պայմաններում իրավիճակի կայունացմանն ուղղված և ադրբեջանական կողմի զսպման գործողությունների:
Արծրուն Հովհաննիսյանից հետաքրքրվեցինք, թե արդյոք այս գործողությունների շնորհի՞վ էր, որ իրավիճակը հանդարտվեց։ «Կարծում եմ, այո։ Եվ դա շարունակվելու է, եթե հակառակորդն իր պահվածքը չփոխի»,- պատասխանեց Պաշտպանության նախարարի մամուլի քարտուղարը։
Կարդացեք նաև
Արծրուն Հովհաննիսյանը նաեւ ասաց, որ ինչպես միշտ՝ Ադրբեջանը չհարգեց ԵԱՀԿ Մինսկի խմբի համանախագահների կոչը եւ խախտեց հրադադարի ռեժիմը։
Հիշեցնենք, որ մարտի 18-ին ԵԱՀԿ գործող նախագահի անձնական ներկայացուցիչ Անջեյ Կասպրշիկը հանդես էր եկել Նովրուզ Բայրամի եւ Զատիկի օրերին հրադադարի ռեժիմի պահպանման կոչով։ Իսկ մարտի 21-ին այդ կոչին միացել էին ԵԱՀԿ Մինսկի խմբի համանախագահները եւ ԵԱՀԿ նախագահությունում Գերմանիայի կառավարության հատուկ ներկայացուցիչը։
Աշոտ ԻՍՐԱԵԼՅԱՆ
Լուսանկարը՝ Արծրուն Հովհաննիսյանի ֆեյսբուքյան էջից
