«Համատեղ միջոցառում չի եղել: Մեր միջոցառումից մի 30-40 մետր հեռավորության վրա, ՀԵՀ-ից մի 10-11 հոգի կանգնած էին: Երեկոյան այնպիսի տեղեկություն գնաց, որ ամենն իրենք են կազմակերպել»,- Aravot.am-ի հետ զրույցում ասաց «Մենք» երիտասարդական նախաձեռնության համակարգողներից Տիգրան Մազմանյանը:
Այսօր հաղորդագրություն էր տարածվել լրատվամիջոցներին`Զատիկի տոնակատարությունների առիթով կայացած ազգային պարերի ֆլեշմոբի մասին: Ըստ այդմ, միջոցառումը կազմակերպել եւ անցկացրել են Հայաստանի հանրապետական կուսակցության երիտասարդական կազմակերպության եւ «Ոչ պետական բուհերի ուսանողական կենտրոն» (ՈՊԲՈՒԿ) հասարակական կազմակերպության անդամները` «Մասունք» պարային համույթի ղեկավարությամբ: Միջոցառումը կայացել է Հյուսիսային պողոտայում:
Դրան հաջորդեց «Մենք» երիտասարդական նախաձեռնության անդամ Տիգրան Մազմանյանի տարածած հաղորդագրությունն առ այն, որ «Մենք» երիտասարդական նախաձեռնությունը 2016 թվականի մարտի 23 –ից, ամեն օր ժամը 17:00 -ից, բարեգործական նպատակով դրամահավաքներ է կազմակերպում Հյուսիսային Պողոտայում: Ակցիայի նպատակն է հավաքված գումարը, քաղցրավենիքը, ծխախոտը եւ այլ իրերը ակցիայի ավարտից հետո փոխանցել Ջաբրաիլում տեղակայված զորամասի զինվորներին. «Իսկ երեկ Հանրապետական կուսակցության երիտասարդական կազմակերպությունը կեղծ հաղորդագրություն է ուղարկել գրեթե բոլոր ԶԼՄ-ներին և այդ ամենը ներկայացրել որպես ֆլեշմոբ` նվիրված զատիկին և վերնագրել որպես ՀՀԿ-ի կազմակերպած»: Ի դեպ, երեկ ակցիայի վերջին օրն էր:
«ՈՊԲՈՒԿ» ՀԿ նախագահ Արմինե Բարսեղյանն Aravot.am-ի հետ զրույցում պատմեց, որ իրենք Հյուսիսային պողոտա են գնացել 16. 30 –ին, քանի որ ազգագրական պարերի ֆլեշմոբը նախատեսված էր 17. 00-ին: «Քանի որ իրենց երաժշտությունը շատ բարձր էր, ես մոտեցա ու խնդրեցի ընդամենը 15 րոպեով անջատել իրենց երաժշտությունը, քանի որ մեր միջոցառումը հենց այդքան էր տեւելու: Կազմակերպության նախագահ Արման Անդրեասյանը քաղաքակիրթ, սիրալիր պատասխանեց, որ խնդիր չի տեսնում»:
Կարդացեք նաև
Արմինե Բարսեղյանը պատմեց, որ Արման Անդրեասյանը եւ «Մասունք» պարային համույթի ղեկավարը`Լուսինեն, պարզվել է, որ ծանոթներ են: Արման Անդրեասյանն էլ առաջարկել է, որ այդ ընթացքում միասին անեն միջոցառումը, քանի որ բավական մարդ է հավաքված եղել:
«Իրենք շատ քաղաքավարի պատասխանեցին, զարմացանք, որ նման խնդիր եղավ»,- շարունակեց մեր զրուցակիցը:
«Ես նման բան չգիտեմ, ինձ ոչ ոք ոչինչ չի ասել, ես այնտեղ եմ եղել, նման բան չի եղել»,- մեզ հետ զրույցում շարունակեց պնդել Տիգրան Մազմանյանը:
Արմինե Բարսեղյանը նաեւ պատմեց, որ հայտնի հաղորդագրություններից հետո ինքը զրույց է ունեցել Արման Անդրեասյանի հետ, վերջինս ասել է, որ թյուրիմացություն է եղել, «մեր թիմակիցները մեզ ճիշտ չեն հասկացել, ձեր միջոցառման վրա էլ ցեխ է շպրտվել»:
Aravot.am-ը փորձեց նաեւ Արման Անդրեասյանի հետ զրուցել: Վերջինիս հեռախոսն անջատված էր:
Նելլի ԳՐԻԳՈՐՅԱՆ
