«Դա այն խո՞ւմբն է, որը ոստիկանների համար, ամեն օր, 15-25 հոգով միտինգ է անում»,- Aravot.am-ի հետ զրույցում այսպես արձագանքեց ՀՀԿ խմբակցության քարտուղար Գագիկ Մելիքյանը հարցին`ինչպես է վերաբերվում «Նոր Հայաստանի»՝ օրերս հրապարակած իշխանափոխության ճանապարհային քարտեզին:
Ճանապարհային քարտեզը երեք կետ է նախատեսում` հեռացնել վարչախմբին, անցումային կառավարում իրականացնել, արտահերթ ընտրություններ անցկացնել: Առաջին`վարչախմբին հեռացնելը «Նոր Հայաստանում» այսպես են պատկերացնում` քաղաքական եւ հասարակական ուժերը միավորվում են, ապա՝ ներգրավում ժողովրդական լայն զանգվածներին, հետո արդեն, արտահերթ ընտրություններ անցկացնելու պահանջով, ժողովուրդը վերջնագիր է ներկայացնում «ռեժիմի պարագլուխներին»: Քարտեզի իրականացման ճանապարհին նախատեսվում են նաեւ քաղաքացիական անհնազանդության միջոցներ՝ վարչական շենքերի շրջափակում, ճանապարհների ու փողոցների փակում:
Գագիկ Մելիքյանը եւ «Նոր Հայաստանի» անդամները, հիշեցնենք, «հին հաշիվներ» ունեն`ժամանակին, համազգային մոբիլիզացիայի դեռ նախնական շրջանում միմյանց անվանարկեցին, դատի տվեցին:
Կարդացեք նաև
Այնուհանդերձ, ճանապարհային քարտեզ է հրապարակվել, «Նոր Հայաստան»-ը ծրագրում է նաեւ իշխանափոխության ավարտից հետո Սահմանադրական դատարանի միջոցով արգելել ՀՀԿ-ի գործունեությունը: Գագիկ Մելիքյանը հեգնում է. «Կարծում եմ, դա «Արմքոմեդիի» տղաների համար սցենարի լուրջ փաստաթուղթ կարող է լինել»:
Նելլի ԳՐԻԳՈՐՅԱՆ
