Aravot.am-ը ՀՀ Գիտությունների ազգային ակադեմիայի (ԳԱԱ) նախագահ Ռադիկ Մարտիրոսյանից հետաքրքրվեց՝ ինչպե՞ս է վերաբերվում օրերս խորհրդարանական լսումների ժամանակ ՀԱԿ խմբակցության պատգամավոր Արամ Մանուկյանի՝ գիտնականներին տրված այն որակմանը, թե հետաքրքիր չեն եւ մոդայիկ չեն:
«Ինչ է նշանակում՝ մոդայիկ չեք…Երեւի այդպես ասելով նա նկատի է ունեցել այն, որ գիտության վարկը մեր հանրության մեջ հիմա այն չէ, ինչ եղել է մի 30-40 տարի առաջ: Դրանում ինչ-որ ճշմարտություն կա: Ճշմարտություն այն առումով, որ վարկը գիտության եւ գիտական աշխատողի իջել է, դրանում չենք վիճի:
Կարծում եմ՝ սա ուղղակի չարախոսություն է գիտության նկատմամբ, ուրիշ ոչ մի բան: Մանավանդ կարծեմ թե դպրոցի ուսուցիչ կամ նման մի բան է եղել…
Իսկ մոդայիկ լինելու վերաբերյալ գնահատականներ տվողներն իր մակարդակի մարդիկ չեն, գիտությունն ունի համաշխարհային գիտական արդյունքների գնահատման չափանիշներ, ձեւեր, վիճակագրական տվյալներ, եթե ուզում եք, կարող եմ նյութեր տրամադրել, որոնք ցույց են տալիս գիտության դերն ամբողջ աշխարհում: Ընդհանուր առմամբ՝ նրա մակարդակում չեն գիտությունը գնահատում, եւ երեւի նա նկատի ունի ոչ միայն մեր գիտությունը, այլ ընդհանրապես: Իսկ մեր գիտությունը տարածաշրջանում ամենաբարձր մակարդակ ունեցող գիտությունն է: Տվյալները, ցուցանիշները ոչ թե մեր, այլ միջազգային մասնագետների կողմից են տրված ու գնահատված»,-ասաց ԳԱԱ նախագահը:
Կարդացեք նաև
Ինչ վերաբերում է ՀԱԿ պատգամավորի այն զուգահեռին, որ ՀՀՇ-ի իշխանության տարիների օրենսդիր մարմնում ընդգրկված էին բազմաթիվ լուրջ գիտնականներ, պարոն Մարտիրոսյանը պատասխանեց. «Ճիշտ կլինի, որ ամեն բնագավառի մարդ լինի իր բնագավառում: Այո, քաղաքականությունում երբեմն լինում է եւ գիտնականը, եւ գյուղատնտեսը եւ բժիշկը, բայց ճիշտ կլինի, որ օրենսդիր մարմնում քաղաքագետներ լինեն, մասնագետներ, թեեւ վատ չէր լինի, որ գիտնականներ էլ լինեին:
Իմիջիայլոց, ուրիշ երկրների խորհրդարաններում, օրինակ՝ Ռուսաստանի պետական դումայում էլ բավականին թվով գիտնականներ կան, իսկ ՀՀՇ-ի ժամանակ իր նման գիտնականներ գուցե եղել են, բայց լուրջ գիտնականներից ես չեմ հիշում, թե ով է եղել»:
Գոհար ՀԱԿՈԲՅԱՆ
